Шымкент қаласында соңғы күндері Төтенше жағдайлар министрлігінің құтқарушылары мен өрт сөндірушілері бір емес, бірнеше маңызды оқиғада ерлік пен кәсібиліктің жарқын үлгісін көрсетті. Олар адам өмірін сақтап қана қоймай, қасиетті орындарды жалыннан қорғап, халықтың күнделікті тіршілігіне қауіп төндірген төтенше жағдайлардың алдын алды.
Олардың табандылығы мен батыл қадамдары – халықтың сенімі мен тыныштығының кепілі.
ҚАСИЕТТІ МЕШІТТІ АМАН САҚТАДЫ
Өткен аптада Шымкент қаласының 112 бірыңғай кезекші қызмет пультіне үрейлі хабар түсті: Тұран ауданындағы Қ. Әділбеков көшесінде орналасқан екі қабатты мешіттің төбесінен қою түтін шығып жатқаны байқалған.
Бұл хабарды естіген бойда қалалық ТЖД өрт сөндіру бөлімдері оқиға орнына жетіп, дереу іске кірісті. Жауынгерлер шатырдың ағаш конструкцияларын ашып, өрттің көзін тапты. Жедел әрі кәсіби әрекеттердің арқасында жалын ұлғайып, қасиетті мешіттің ішін шарпыған жоқ.
Ең бастысы – адамдар зардап шекпеді. Құтқарушылардың дер кезінде жасаған іс-қимылы мешітті үлкен апаттан сақтап қалды. Бұл оқиға өрт қауіпсіздігін сақтау әрбір тұрғынның басты міндеті екенін тағы бір мәрте көрсетті.
ЖАСӨСПІРІМ МЕН ЖАНУАРДЫ ҚҰТҚАРҒАН ҚАЙСАРЛЫҚ
Шымкенттің Абай ауданы, Алтынтөбе тұрғын алабында күтпеген жағдай болды. 2012 жылы туған жасөспірім серуендеп жүрген кезінде абайсызда 5 метрлік терең шұңқырға атпен бірге құлап кетті.
Жағдайдың қауіптілігін аңғарған куәгерлер бірден «112» қызметіне хабарласты. Оқиға орнына дер кезінде жеткен ТЖМ құтқарушылары шұғыл шешім қабылдап, альпинистік құралдарды пайдалана отырып, баланы абайлап шұңқырдан шығарып алды.
Жасөспірімнің серігі болған ат арнайы автокранның көмегімен шығарылып, иесіне қайтарылды. Ал бала медицина қызметкерлерінің тексеруіне жіберіліп, өміріне ешқандай қауіп төніп тұрмағаны анықталды.
Бұл оқиға құтқарушылардың кәсібилігі мен жедел қимылы ғана емес, олардың адам өміріне, жануар тағдырына да бірдей жауапкершілікпен қарайтынын айқын көрсетіп берді.
САУДА ОРТАЛЫҒЫНДАҒЫ ЖАЛЫНДЫ АУЫЗДЫҚТАДЫ
Шымкент қаласының Төлеметов көшесінде орналасқан ірі сауда-ойын-сауық орталығында да төтенше жағдай тіркелді. Қою түтін мен ашық жалын қысқа уақыт ішінде ғимаратты шарпи бастады.
Өрттің жоғары деңгейі ескеріліп, қосымша күш пен техникалар жұмылдырылды. Құтқарушылар автосаты мен үш иінді сатыларды қолданып, ғимараттың жоғарғы қабаттарына көтерілді.
Жедел әрі батыл қимылдың нәтижесінде екі адам шатыр арқылы, тағы үш адам екінші қабаттан құтқарылды. Қалған азаматтар өздігінен эвакуацияланды.
Өрттің жалпы аумағы 270 шаршы метрді құраса да, құтқарушылардың үйлесімді жұмысының арқасында ғимарат толық жанып кетуден сақталды.
Өрт сөндірушілер мен құтқарушылар – бейбіт күнде ел тыныштығы үшін жанын шүберекке түйіп, әрқашан дайын тұратын қаһармандар. Олардың әрбір әрекеті – тек кәсібилік емес, жүректегі отансүйгіштік пен халық алдындағы адалдықтың белгісі.
ТЖМ ескертеді: «Өрт қауіпсіздігі ережелерін сақтайық! Бұл – өзіміздің ғана емес, өзгелердің де өміріне деген жауапкершілік».
ҚҰТҚАРУШЫЛАРДЫҢ ОТБАСЫ – МЫЗҒЫМАС ТІРЕК
Шымкент қаласында өрт сөндірушілер мен құтқарушылардың отбасы мүшелері Төтенше жағдайлар министрлігінің 30 жылдығына орай өткен мерекелік іс-шараға қатысты. Шара «ҚР ТЖМ 30 жылдығына арналған 30 игі іс» акциясы аясында ұйымдастырылды.
Мақсат – төтенше жағдайлар қызметінің маңызды миссиясымен жақынырақ таныстыру, отбасылық құндылықтарды дәріптеу және құтқарушылардың кәсіби еңбегіне құрмет көрсету.
Іс-шара барысында қонақтарға өрт сөндірушілердің күнделікті қызметі таныстырылып, арнайы техника мен жабдықтар көрсетілді. Отбасы мүшелері қызметтік бөлмелерді аралап, демалыс орындары мен асхананы көрді. Сондай-ақ олар арнайы киімдерді киіп, құтқарушы мамандығының жауапкершілігі мен қатерін сезінуге мүмкіндік алды.
Оған қоса, тұрмыстық қауіпсіздік ережелері түсіндіріліп, өрт сөндіру мен алғашқы көмек көрсету бойынша практикалық жаттығулар ұйымдастырылды. Балалар мен ата-аналар үшін психологиялық тренинг те өткізілді.
Бұл мереке құтқарушыларға қолдау көрсетіп қана қоймай, олардың ардақты еңбегінің артында тұрған отбасылардың да шыдамдылығы мен мызғымас тірегін айқындады.
