Шымкентте әскери міндеттілердің арнайы оқу-жаттығу жиыны басталды. 
Шымкент қаласының аумақтық қорғаныс бригадасында әскери міндеттілерге арналған арнайы оқу-жаттығу жиыны салтанатты түрде ашылды. Тоқсаннан астам шымкенттік азамат он күнге «Ақтас» оқу-жаттығу полигонында әскери білімін жетілдіруге кірісті.
Бұл жиынның басты мақсаты – әскери-практикалық дағдыларды шыңдау, жауынгерлік даярлық деңгейін көтеру және Отанды қорғауға әрдайым дайын болу.
Жиынға қатысушылардың бірі – Шымкент қаласындағы №124 мектептің физика пәнінің мұғалімі, запастағы лейтенант Мақсат Юлдашев. 2013 жылы әскери кафедрада офицерлік дайындықтан өткен ол бұл жолы алғаш рет әскери жиынға шақырылып отыр.
– Әрбір азамат үшін Отан қорғау – қасиетті міндет. Әскери жиынға келу арқылы өзімнің азаматтық борышымды сезініп, тәжірибемді жетілдіргім келеді. Болашақта елімнің тыныштығын қорғауға дайын болу – басты арманым, – дейді ол.
Аумақтық қорғаныс бригадасының күзгі тактикалық оқу-жаттығуына 93 әскери міндетті шақырылды. Олар 17–26 қыркүйек аралығында әскери дайындықтан өтеді. Мұндай жиындар әр бес жыл сайын өткізіліп, қатысушылардың жауынгерлік қабілетін жетілдіруге мүмкіндік береді.
Әскери бөлім командирі полковник Бақытжан Әшімовтің айтуынша, оқу-жаттығу жоспары тәжірибелі офицерлер мен нұсқаушылардың жетекшілігімен жүргізілуде. «Ақтас» полигонында қажетті барлық жағдай жасалған: жатын орындар, асханалар, оқу сыныптары бар.
Айта кетейік, арнайы оқу-жаттығу жылына екі рет – көктемде және күзде ұйымдастырылады. Биыл көктемде өткен жиынға 200-ге жуық әскери міндетті қатысқан болатын. Жауынгерлік даярлық кезінде олардың негізгі жұмыс орны мен жалақысы сақталады, сондай-ақ киім-кешекпен және азық-түлікпен толық қамтамасыз етіледі.
Әскер – ел қорғаны, ал Отан алдындағы борыш – әр азаматтың абыройлы парызы.
