Шымкентте қала әкімі Әлем және Азия чемпиондарын қабылдап, олардың тарихи жеңістерін атап өтті. Ерекше қуаныш сыйлаған ағайынды Сабырхандар болды. Махмұд екінші рет әлем төрінде топ жарса, 19 жастағы Төрехан тұңғыш рет чемпион атанды. Жеңімпаздарға демеушілердің қолдауымен пәтер мен автокөлік кілттері табысталды. Жақында ғана Англияның Ливерпуль қаласында өткен бокстан Әлем чемпионатында Қазақстан құрамасы тарихи нәтижеге қол жеткізді. Жеті алтын, бір күміс, екі қола медаль – бұл ел спортының шежіресіне жазылған рекорд. Осы жеңістің ішінде ағайынды Сабырхандардың табысы ерекше. Махмұд Сабырхан тұғырдың ең биік сатысына екінші рет көтерілсе, 19 жастағы Төрехан алғаш рет Әлем чемпионы атанып, қазақ боксының жаңа тарихын жазды.
Шымкент спортының өзге де жарқын жеңістері бар. Бангкокта өткен жастар арасындағы Азия чемпионатында Санжар-Әли Бегалиев алтын медаль иеленді. Ал тоғызқұмалақтан үш дүркін Әлем чемпионы Ғалымжан Темірбаев Абайдың 180 жылдығына арналған халықаралық турнирде жеңімпаз атанды. Сол сияқты қазақ күресінің хас шебері Жұмажан Қожамбеков әскерилер арасындағы әлем чемпионатында қарсылас шақ келтірмей, чемпиондық белдігін тағы да қорғап шықты.
Қала әкімі спортшылардың жеңістерін тек жеке жетістік емес, бүкіл елдің абыройы деп атап өтті. Жеңімпаздарға құрмет ретінде демеушілер тарапынан автокөлік пен пәтер кілті табысталды. Бұл – олардың қажырлы еңбегінің лайықты бағасы.
Шымкенттің чемпиондары бүгінде ел мақтанышы. Спортшылар алдағы Олимпиада ойындарында да көк туды биікте желбіретуді мақсат етіп отыр.
