ҮЗДІК ӘУЛЕТТЕР МАРАПАТТАЛДЫ

     Шымкентте «Отбасы күні» мерекелік іс-шарасы өтті. Аталмыш шара Қазақстан халқы Ассамблеясының 30 жылдық мерейтойы аясында ұйымдастырылған. Мақсаты – отбасы құндылықтарын дәріптеп, қоғамдағы бірлік пен келісімді нығайту. Сондай-ақ мерекелік жиында үлгілі отбасылар үш номинация бойынша марапатталды.

Отбасы күніне арналған мерекелік іс-шара мәдени бағдарламаға ұлас­ты. Ән мен биге жалғасқан кеште үздік әулеттер «Азамат тәрбиелеген отбасы», «Күміс кереге» және «Алтын шаңырақ» номинациялары бойынша марапатталды. Жеңімпаздарға арнайы лента, алғыс хаттар мен естелік сыйлықтар табыс етілді. Сондай-ақ, олардың өмірлік тәжірибесін насихаттайтын бейнематериалдар көрерменге ұсынылды.

«Алтын шаңырақ» номинациясы – тату отбасының, сыйластық пен берекенің символы. Бұл марапат ұлттық бірлік пен рухани келісімді нығайтып, өнегелі әулеттерді қолдауға бағытталған. Ұрпақ тәрбиесінде жауапкершілік танытып, ұлттық құндылықтарды дәріптеген үлгілі әулеттер осы атаққа лайық деп танылды.

Мерекелік іс-шарада дәл осы номинацияны 50 жыл отасқан Үсенбековтер отбасы иеленді. Номинациялар отбасылық татулықтың, сыйластық пен берекенің, ұрпақ тәрбиесіндегі жауапкершіліктің айқын үлгісін паш етті. Сонымен қатар мерекелік іс-шара өнегелі әулеттерді дәріптеп, қоғамдағы отбасы институтының мәртебесін арттыруға зор үлес қосты.