Көшедегі көрнекі жазулар – жай ғана хабарландыру емес, олар – тіл мәдениетінің бет-бейнесі, қоғамның таным көзі. Әрбір жарнама мен маңдайшадағы сөз – оқырманның санасына сіңетін мәдени код, ал оның сауатты жазылуы – тілге деген құрметтің көрінісі. Бүгін осы мәселеге қатысты Шымкент қаласында «Мемлекеттік тілдің мәртебесі және қоғамдық орындардағы міндеттілік» атты семинар өткізілді.
Семинардың негізгі мақсаты – кәсіпкерлер мен бизнес өкілдеріне «Қазақстан Республикасындағы тіл туралы» заң талаптарын түсіндіру, фискалдық чектерді мемлекеттік тілде шығару ісін қамтамасыз ету, сондай-ақ көрнекі ақпарат құралдарын, жарнама, маңдайша, баға көрсеткішін талапқа сай рәсімдеуді үйрету болды.
А.С. Пушкин атындағы қалалық әмбебап кітапханасында өткен жиынға тіл саласының мамандары, жергілікті атқарушы органдардың өкілдері, кәсіпкерлер, жарнама агенттіктері қатысты. Семинар барысында заң талаптарын сақтамаудан туындайтын мәселелер талқыланып, жарнама агенттіктері мен кәсіпкерлер арасында ынтымақтастық орнату жайы сөз болды.
Сонымен қатар, жаңадан енгізілген өзгерістерге сәйкес, республикалық маңызы бар қалаларда маңдайша мәтіндерін тіркеу және рұқсат беру рәсімдері қарастырылатыны айтылды.Шымкент қалалық тілдерді оқыту-әдістемелік орталығының қазақ тілі мұғалімі Айткүл Жұмабаева қостілділік мәдениеті, дұрыс аударма мен мазмұн сәйкестігі мәселелеріне тоқталып, калька аудармалардың тіліміздің табиғи болмысына нұқсан келтіріп жатқанын атап өтті.
