Шымкент қаласында отбасы құндылықтарын дәріптеп, халқымыздың ұмыт бола бастаған әдет-ғұрыптары мен салт-дәстүрлерін қайта жаңғыртуға арналған «Есті ене, көргенді келін» байқауы ұйымдастырылды. Шараның басты мақсаты – әрбір отбасындағы ене мен келіннің орнын айқындап, олардың шаңырақтың береке-бірлігін сақтаудағы маңызын ұғындыру. Оған қаланың бес ауданынан келген әжелер мен келіндер қатысып, өз өнерлерін ортаға салды.
Халқымыз ежелден қыз баланың тәрбиесіне ерекше көңіл бөлген. Себебі қыз бала, ең алдымен, ұлтымыздың айнасы. Болашақ ана. Бір шаңырақтың берекесін келтірер сүйікті келін. «Келін – ененің топырағынан» дейді дана халық. Расында, отбасының ұйытқысы ене мен келін арасындағы мызғымас қарым-қатынаспен, сыйластықпен тығыз байланысты. Осындай асыл қасиеттерді өмірлік мақсат еткен қатысушылар біріншіден шаңырақтың шайқалмауын насихаттаса, екіншіден ене мен келін арасындағы ауызбіршілікті сақтауға үлес қосатындарын айтады.
Енелерімен бірге келіндер қатысқан сайыс 4 кезең бойынша өтті.Алғашқы кезең таныстыру келіннің үлкенге ізетін дәстүр арқылы көрсетіп,ситуациялық сұрақтарға жауап берумен аяқталды. Сайыстың басты мақсаты үлгілі келін бойынан табылу керек игі қасиеттерді жандандыру,әдет-ғұрып,жөн-жоралғыларды жас ұрпаққа таныстыру дейді мамандар.
