ҚҰҚЫҚТЫҚ МӘДЕНИЕТ — ЖАРҚЫН БОЛАШАҚ КЕПІЛІ

Шымкент қаласында №145 мектепте «Егемен ел – жарқын болашақ» тақырыбында «Прокурор сағаты» өтті. Шарада оқушыларға қылмыстың қауіптілігі, қылмыстық жауапкершілік пен жаза түрлері түсіндірілді. Қалалық білім басқармасының бастамасымен өткен бұл жұмыс барлық мектептерді қамтып, алдағы уақытта тұрақты жалғасын табады.

  Іс-шараға қала прокуратурасының мамандары қатысып, жасөспірімдерге қылмыстың қоғамға әкелетін зардаптары мен жауапкершіліктің салмағы туралы кеңінен түсіндірді. Олар нақты өмірден алынған мысалдар арқылы заң бұзушылықтың тек жеке адамға ғана емес, бүкіл қоғамға қауіпті екенін атап өтті.

Жиында қылмыстық жауапкершілікке тартылу жасы, жаза түрлері, құқық бұзушылықтың алдын алу жолдары жайлы жан-жақты айтылды. Сондай-ақ, жас ұрпақты адалдыққа, тәртіпке, салауатты өмір салтын ұстануға шақыру басты назарда болды. Шараны ұйымдастыруға Шымкент қалалық білім басқармасы мұрындық болды. Басқарманың бастамасы арқасында «Прокурор сағаты» мегаполистегі барлық мектептерді қамтып отыр. Бұл – жас ұрпақтың құқықтық сауаттылығын арттыруға арналған жүйелі жұмыстың айқын көрінісі. Ұйымдастырушылардың айтуынша, мұндай кездесулер алдағы уақытта да тұрақты түрде өткізіліп, оқушылардың құқықтық санасын көтеруге, қылмыстың алдын алуға бағытталмақ. Жастарды қылмыстан бойын аулақ ұстап, отансүйгіштікке, жауапкершілікке тәрбиелеу – бүгінгі қоғамның басты міндеттерінің бірі. Ал «Прокурор сағаты» осы мақсатқа жетудің тиімді жолдарының бірі болып отыр.