ШЫМКЕНТ БАРЫСЫ АНЫҚТАЛДЫ.

Шымкентте қазақ күресінің байрағы тағы да биікке көтерілді. Аса ауыр салмақтағы балуандар арасында дәстүрлі, 13-рет ұйымдастырылып жатқан «Шымкент барысы» турнирі өтуде. Биыл бозкілемге шаһардың ең мықты деген 20-дан астам балуаны шығып, өзара мықтыны анықтайды. Жеңімпаздар «Қазақстан барысы» республикалық сайысына жолдама алып қана қоймай, қомақты қаржылай сыйақыға да ие болады.

Жарыстың салтанатты ашылу рәсіміне қалалық мәслихаттың төрағасы мен спорт басқармасының өкілдері арнайы қатысты. Сайыс Қазақстан Республикасының Әнұранымен ашылып, балуандар бозкілемге шығу ретін жеребе арқылы анықтады. Бұл турнир — тек қалалық деңгейдегі беделді дода ғана емес, сонымен қатар үлкен спортқа жол ашар маңызды баспалдақ. Жеңімпаздар тікелей республикалық «Қазақстан барысы» турниріне қатысу мүмкіндігіне ие болады. Қатысушылар қатарында тәжірибелі балуандармен қатар, жас спортшылар да бар. Олар өз шеберліктерін көрсетіп, көрермендерге нағыз қазақ күресінің үлгісін ұсынуға тырысатынын айтты.

Турнир барысында тартысты белдесулердің көп болары сөзсіз. Бұл сайыста тек күш емес, ептілік пен төзімділік те сынға түседі. Жарыс қорытындысы бойынша үш үздік балуан анықталады. Қожагелдіұлы Нұрсұлтан Бірінші орынды иеленіп  1 миллион теңге, екінші орынға – Әбдімәліков Мейіржан табан тіреді, ал байрақты бәсекеде Құрал Мадияр үшінші орынға ие болды. «Шымкент барысы» — жас балуандар үшін үлкен спортқа жолдама. Көрермендер турнирден қазақ рухы мен күрестің қайталанбас көрінісін тамашалап, нағыз ұлттық спорттың шынайы атмосферасын сезіне алды.