ЖОЛДАУДЫҢ БАСЫМ БАҒЫТТАРЫ

Шымкентте Мемлекет басшысының «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауы бойынша жиын өтті. Қала әкімдігінде өткен алқалы басқосуда Президент айқындаған жаңа бағыттардың маңызына тоқталып, оларды жүзеге асыру жолдары жан-жақты сараланды. Жиынға қала әкімі, мәслихат депутаттары, қоғам белсенділері мен зиялы қауым өкілдері қатысып, өз ой-пікірлерін ортаға салды. Жолдаудағы бастамалардың ел дамуына ықпалы сөз болып, алдағы реформаларды нақты іс-қадамдар арқылы жүзеге асырудың тиімді тәсілдері қарастырылды.Президенттің кезекті Жолдауына қатысты басқосқан әкімдіктің қызметкерлері, қоғам белсенділері кеңестің басын Әнұранмен басталды. Қала әкімі Президент Жолдауы елдің даму бағытын нақты айқындайтынын атап өтті. Ол Жолдауда көтерілген экономикалық өсім, әлеуметтік тұрақтылық және ғылым мен әділеттілік мәселелеріне назар аударды. Әкім бұл бастамалар ел болашағы үшін маңызды екенін жеткізді. Сонымен қатар, әр азамат өз еңбегімен ел игілігіне үлес қосуы қажет екенін атап өтті. Жиында мәслихат төрағасы инвестиция тартудың маңыздылығын атап өтіп, бұл бағытта бірлесіп жұмыс істеуді шақырды. Сондай-ақ, жасанды интеллект пен цифрландыру мәселелеріне ерекше назар аударды. Президенттің жолдауында жасанды интеллект сөзі 31 рет, ал цифрландыру сөзі 47 рет қайталанып, олардың маңыздылығы көрсетілді. Бұл мәселелердің әрқайсысы еліміздің дамуы үшін аса маңызды. Қоғамдық кеңестің мүшесі Біржан Байтуов мәдениетті қала болуымыз керек деп айтты және Бауыржан Момышұлының «Тәртіпке бас иген құл болмайды» деген даналық сөзін мысалға келтірді. Яғни қоғамда мәдениетті қалыптастыру  міндеті тұр. Ғабит Сыздықбеков бұл бағытта жұмысты жүйелі ұйымдастыруды, мектеп бағдарламаларына осы мәселелерді енгізуді ұсынды.

Шымкент қаласы ел үшін маңызды міндеттерді жүзеге асыруға белсенді атсалысады. Қала әкімі экономика мен әлеуметтік инфрақұрылымды дамыту жұмыстары жүйелі жалғасатынын атап өтті. Халықтың тұрмыс сапасын жақсарту басты назарда болады. Инвестиция көлемін арттыру және «Smart Shymkent» жобасы аясында пилоттық жоба енгізу жоспарлануда. Жалпы кезекті Жолдауда көтерілген маңызды мәселелер Шымкент қаласында өткен кеңесте де кеңінен талқыланды. Кеңес барысында сала басшыларына нақты міндеттер жүктеліп, оларды тиімді жүзеге асырудың жолдары айқындалды. Бұл – еліміздің одан әрі дамуы мен өркендеу жолында ерекше маңызға ие қадамдардың бірі.