5 қыркүйек тілдер мерекесі. Шымкентте мерекеге орай «Қазақ тілі – Ұлы даланың ұлтаралық тілі» атты форум өтті. Жиын барысында мемлекеттік тілдің қоғамдағы орны мен келешегі жан-жақты талқыланды. Жиын барысында қала әкімінің орынбасары Сәрсен Құранбек қазақ тілінің ұлт болашағындағы рөліне ерекше тоқталып, оның мемлекеттік тіл ретінде қоғамның барлық саласында кеңінен қолданылуы қажеттігін атап өтті.
Бұл форум – Мемлекет басшысының Жолдауында көрсетілген тіл саясатын іске асыру жолындағы маңызды қадамдардың бірі. Жиын барысында мемлекеттік тілді дамыту, оның қолданылу аясын кеңейту секілді өзекті мәселелер талқыланды. Форумға тіл жанашырлары қатысып, олардың ішінде қазақ тілінің тазалығын насихаттап жүрген Назгүл Қожабек те арнайы сөз сөйледі. Ол калька аудармалар мен тілдік қателерге тоқталып, сауатты жазу мен сөйлеудің маңызын атап өтті. Сондай-ақ, сөз арасында жиі жіберілетін қате тіркестердің дұрыс нұсқаларын түсіндіріп, пайдалы ақпаратпен бөлісті.
Қала әкімінің орынбасары Сәрсен Құранбек мемлекеттік тілдің мәртебесін көтеру – әр азаматтың басты борышы екенін атап өтті. Ол Шымкент қаласында атқарылып жатқан жұмыстар мен болашақтағы жоспарларға тоқталып, тіл саясатын жүзеге асыруда жұртшылықтың белсенділігі маңызды екенін жеткізді. Сөз барысында Шымкенттің көпұлтты қала екенін айтып, бұл ретте тіл үйрету әдістемесінің халықаралық тәжірибеге негізделіп, жақсы нәтиже беріп жатқанын атап өтті.
