Ертеде патриотизм – Отан қорғап, ерлік жасау еді. Ал жаһанданған бүгінгі қоғамда елді цифрландыру жұмысына атсалысқан әр азамат – Отанының жанашыры болып отыр. Мегаполис ардагерлері Жолдауда айтылған басым бағыттарды саралай келе, ойларын осылай қорытты.
Цифрландыру – қоғамның әр саласына ауадай қажет. Уақыттың бұл талабы халықтың жеке уақытын үнемдеп, жұмысын жүйелеуге, сапалы қызмет алуға мүмкіндік беріп келеді. Мемлекет басшысының Жолдауда цифровизацияға қатысты жүктеген міндеттері бұл бағытқа серпін беріп, елімізді жаңа кезеңге жетелейді. Осы бастама аясында қалалық ардагерлер кеңесі бас қосып, алдағы жоспарларын талқылады. 
Жолдаудың басым 7 бағыты бойынша ардагерлер жеке-жеке баяндады, тұщымды ойын ортаға салды. Ұзақ жылдар бойы заң саласында еңбек еткен Бекет Тұрғараев елдің құқықтық мәдениетін көтеруде Парламенттің рөліне тоқталды. Ол Президенттің пәрмені заң шығарушы органның тиімділігін арттырып, халық сенімін нығайтатынын жеткізді. Сонымен қатар, ардагерлер кеңесінде су саласының геосаяси маңызы қозғалды. Әсіресе Шардара су қоймасындағы судың азаюы, қарт Каспийдің транслогистикасы – ардагерлерді алаңдатып отыр. Ардагерлер кеңесінің мүшесі Абдулла Ахметов өз кезегінде Жолдаудағы Шымкент қаласына қатысты нақты тұстарды таразылады. Ол мегаполистің әлеуметтік және экономикалық дамуына тың серпін беретін міндеттерге тоқталды. Жиынға қатысқан қала әкімінің орынбасары Сәрсен Құранбек ашық пікір білдірді. Оның айтуынша, шаһарда шешімін таппай жүрген мәселелер бар. Ал сол түйткілдердің түйінін тарқататын басты қадам – цифрлық жүйеге толық көшу. Жолдау аясында мегаполис ардагерлері ел дамуы үшін бірліктің, жаңашылдықтың және уақыт талабына бейімделудің маңызын ерекше атады. «Ұрпаққа қалдырар ең үлкен мұрамыз – өркениетті ел мен өрісті қоғам» деген ақсақалдар ойы жастарға да бағдар болары сөзсіз.
