Шымкент қаласында Қазақстан Республикасы Ұлттық қауіпсіздік комитетінің Шекара қызметі қатарындағы бөлімдерге алғашқы шақырылушыларды аттандыруға арналған салтанатты рәсім өтті. Еліміздің болашағын қорғауға ант берген жас сарбаздардың алғашқы 22-сі Маңғыстау облысындағы шекаралық бөлімшелерге жол тартты.
Іс-шараға қала қорғаныс істері жөніндегі департаментінің бастығы, полковник Әбдігабит Шегебаев қатысып, биылғы күзгі әскерге шақыру науқаны аясында 2 қазанға дейін Шымкенттен шамамен 170 жас азамат шекаралық бөлімдерге жөнелтілетінін айтты. Ал жалпы, күзгі шақыру кезеңінде қала бойынша 1500-ге жуық жас әскер қатарына алынады.
Полковник өз сөзінде Отан алдындағы борышты өтеудің әрбір жас үшін үлкен мәртебе екенін атап өтті. Сонымен бірге әскерге шақырылғандардың құқықтық тұрғыда толық ақпараттандырылып, медициналық тексеруден өтіп, психологиялық және әлеуметтік бейімделуге ерекше көңіл бөлінетінін жеткізді.
Жас сарбаздардың бірі Диас Әбдіхалық өзінің әскерге бару шешімін мақтанышпен бөлісті:
– Әскердегі қызмет – бұл менің азаматтық борышым әрі болашағыма ашылған жол. Мерзімді әскери қызметтен кейін мемлекеттік грант арқылы жоғары білім алу жоспары бар. Ең бастысы – Отан алдындағы парызымды абыроймен орындау, – деді ол.
Салтанатты шара барысында қорғаныс істері департаментінің басшылығы жас сарбаздарды құттықтап, оларға төзімділік пен тәртіп, табандылық пен ерлік тіледі.
Бұл күн – жас сарбаздардың өміріндегі жаңа белес қана емес, сонымен қатар еліміздің тәуелсіздігі мен қауіпсіздігін қорғау жолындағы патриоттық парызды орындаудың айшықты сәті. Шымкенттен шыққан әрбір сарбаз – елдің берік қалқаны, Отанның сенімді қорғаушысы.
