“МЕКТЕПКЕ ЖОЛ» АКЦИЯСЫ 72 ОҚУШЫҒА ҚУАНЫШ СЫЙЛАДЫ

Мегаполисте жаңа оқу жылы қарсаңында «Мектепке жол» акциясы өтті. Іс-шараны қалалық Қазақстан халқы Ассамблеясы мен «Respublica» партиясының әйелдер қанаты бірлесіп ұйымдастырды. Игі бастаманың мақсаты – әлеуметтік қолдауды қажет ететін отбасылардың балаларына жағдай жасап, олардың жаңа оқу жылын толыққанды бастауына мүмкіндік жасау.

     Акция аясында көмек 70-тен аса мектеп табалдырығын аттаған оқушыларға үлестірілді. Балалардың қуанышына орай арнайы шақырылған  аниматорлар би мен ойын ұйымдастырып, шараны шаттыққа бөледі. Сондай- ақ салтанатты жиынға партия өкілдері, Аналар кеңесінің мүшелері және қоғам белсенділері де қатысты.  Аналар кеңесінің төрайымы шараның мәніне тоқталып, балаларға қамқорлық пен мейірім көрсету – баршамыздың ортақ борышы екенін атап өтті. Сондай-ақ мұндай игі бастамалар болашақ ұрпаққа жасалған маңызды қадам екенін жеткізді.

Салтанатты жиын соңында балаларға арнайы сыйлықтар табысталып, олардың жаңа оқу жылына қажетті құрал-жабдықтары толықты. Әрбір бүлдіршін қуанышқа бөленіп, ерекше көңіл-күйге ие болды. Ұйымдастырушылар да өз кезегінде жылы лебіздерін арнап, алдағы оқу жылында табыс пен сәттілік тіледі.