Шаһар тұрғындары бүгін Қонаевтың ескерткішінің алдына жиылды. 22 тамыз – көрнекті мемлекет және қоғам қайраткері, Қазақстан тарихында өшпес із қалдырған Дінмұхамед Ахметұлы Қонаевтың өмірден өткен күні. Зиялы қауым өкілдері қайраткердің ескерткішіне гүл шоқтарын қойып, тағзым етті.
Жиын барысында сөз сөйлегендер Дінмұхамед Ахметұлының ел дамуына қосқан өлшеусіз үлесін, мемлекет басқарудағы парасат-пайымын, қарапайымдылығы мен зиялылығын ерекше атап өтті. ұлы тұлғаның өнегелі өмір жолын өскелең ұрпаққа кеңінен насихаттау – бүгінгі буынның басты парызы. Үш мәрте Социалистік Еңбек Ері атанған, Қазақ КСР Ғылым академиясының академигі, техника ғылымдарының докторы Дінмұхамед Қонаев ширек ғасыр бойы Қазақстанды басқарып, елдің әлеуметтік-экономикалық дамуына елеулі үлес қосты. Деректерге сүйенсек, Қонаев басқарған жылдары республиканың өндірістік әлеуеті 700 пайыздан астам өскен. Өнеркәсіп көлемі 9 есеге, ауыл шаруашылығы 6 есеге, ал күрделі құрылыс жұмыстары 8 есеге артқан. Бұл – ұлы қайраткердің еліміздің өркендеуіне қосқан еңбегінің айқын дәлелі.
