ӘЛЕУМЕТТІК ҚОЛДАУДЫҢ ЖАҢА ЦИФРЛЫҚ МОДЕЛІ

Шымкентте мұқтаж азаматтарға көмекті дәл әрі уақтылы жеткізу үшін цифрлық скоринг моделі енгізілді. Бұл жүйе шынайы мұқтаж жандарды анықтап, қолдауды тиімді әрі әділ үлестіруге мүмкіндік береді. Пилоттық жоба ретіндегі бастама Шымкент қаласы мен Қарағанды облысында жүзеге асырылуда. Бұл — мемлекеттік органдардың бірлескен, жүйелі жұмысының нәтижесі.

Скоринг моделі отбасылардың өмірлік жағдайын 23 түрлі әлеуметтік және экономикалық көрсеткіш бойынша бағалап, оларды 6 санатқа бөледі. Осы санаттар арқылы кімнің шын мәнінде көмекке мұқтаж екені нақты анықталады. 1–5 санаттағы отбасылар автоматты түрде қолдауға ие болады.Яғни, әлеуметтік көмек бұрынғыдай өтініш жазуға тәуелді болмай, нақты деректерге сүйене отырып көрсетіледі.

Бұл тәсіл республикалық төлемдерге әсер етпейді. Зейнетақы, жәрдемақы секілді 41 түрлі әлеуметтік төлем сақталады. Жаңа жүйе — тек жергілікті бюджет есебінен берілетін қосымша көмекті әділ бөлудің тетігі. Шынайы мұқтаж жандар назардан тыс қалмайды. Жоба аясында балалар да назардан тыс емес. «Мектепке жол» акциясы арқылы биыл 56 430 оқушыға 46 500 теңге көлемінде бір реттік көмек көрсетіледі. Сонымен қатар, алдағы оқу жылында 1–4 сынып оқушыларын ыстық тамақпен қамту үшін 9 млрд теңге бөлінді. Барлық мәліметтер «Электрондық үкімет» жүйесінде сақталады және азаматтың рұқсатынсыз ешкімге қолжетімді емес. Бұл — азаматтардың жеке деректерін қорғауға толық кепілдік.