Өрт қауіпсіздігінің сақшысы – Сүйінбай Баратов республикалық байқауда үздік үштіктен көрінді
Өрт қауіпсіздігін қамтамасыз ету – тек қызмет емес, бұл адамдардың өмірі мен мүлкін қорғау жолындағы жауапты миссия. Осындай абыройлы істің майталманы, Шымкент қаласы Төтенше жағдайлар департаментінің Тұран ауданы ТЖ басқармасының бас маманы, азаматтық қорғау майоры Сүйінбай Баратов еліміздегі үздік инспекторлар арасында өткен республикалық байқауда жүлделі ІІІ орын иеленді.
Бұл дода Қазақстан Республикасы Төтенше жағдайлар министрлігінің ұйымдастыруымен өткізіліп, оған барлық өңірлерден үздік деп танылған өрт қауіпсіздігі инспекторлары қатысты. Байқау барысында үміткерлер нормативтік-құқықтық базаны жетік меңгеру, тексеру жұмыстарын жүргізу әдістемесі, құжаттамамен жұмыс істеу шеберлігі және кәсіби этикасы секілді маңызды бағыттар бойынша сынға түсті.
Сүйінбай Баратов республикалық кезеңге дейін өңірлік іріктеу турынан сүрінбей өтіп, үздік нәтиже көрсеткен еді. Тәжірибесі мол маман байқаудағы әр тапсырманы жоғары деңгейде орындап, тартысты додада өз білімін дәлелдеп, үздік үштік қатарынан орын алды.
Бұл жетістік – жеке маманның еңбегі ғана емес, сондай-ақ Шымкент қаласы ТЖ департаментінің кәсіби даярлық деңгейінің айғағы. Сүйінбай Баратовтың табысы жас инспекторларға үлгі болып, өрт қауіпсіздігі саласында сапалы қызмет көрсетуге шабыттандырады.
