Шымкент қаласында жүргізуші куәліктерін заңсыз рәсімдеумен айналысқан ұйымдасқан қылмыстық топтың әрекеті әшкереленді. Бұл қылмыстың жолын кесуге Шымкент қаласының прокуратурасы үйлестіруші орган ретінде бастамашы болып, құқық қорғау органдарының бірлескен жұмысына серпін берді.
Қаржы мониторингі агенттігінің Шымкент қаласы бойынша департаменті жүргізген тергеу нәтижесінде 2023–2024 жылдары «Азаматтарға арналған үкімет» мемлекеттік корпорациясының №2 мамандандырылған ХҚКО басшылығы мен кейбір қызметкерлері теориялық және практикалық емтихандарсыз жүргізуші куәліктерін заңсыз рәсімдеуге жүйелі түрде жағдай жасағаны анықталды.
Тергеу барысында бұл заңсыз қызметтің әр “тұтынушысына” 150 мыңнан 400 мың теңгеге дейін баға қойылғаны белгілі болды. Нәтижесінде кемінде 500 адам заң талаптарын бұза отырып жүргізуші куәлігін иеленген. Қылмыстық топтың заңсыз табысы 150 миллион теңгеден асқан.
Қылмыстық жолмен табылған кірістерді бұғаттау мақсатында күдіктілердің 200 миллион теңгеден астам мүлкіне тыйым салынды.
Қазіргі таңда 15 адамға қатысты айып тағылып, қылмыстық іс толық тергеліп, материалдар сотқа жолданды. Бұл — прокуратураның заңдылықты қамтамасыз етудегі үйлестіруші рөлін, сондай-ақ сыбайлас жемқорлық пен ұйымдасқан қылмыспен күрестегі жүйелі жұмысын көрсететін нақты мысал.
Жүргізуші куәлігін заңсыз алған тұлғалардың көлік құралын басқаруы – жол қозғалысына қатысушылардың өміріне тікелей қауіп төндіреді. Бұл факті – тек сыбайлас жемқорлық емес, сонымен қатар қоғамдық қауіпсіздікке төнген қатер.
Прокуратура ескертеді:
Құқықтық жауапкершілік – кез келген заңсыз әрекетке міндетті түрде қолданылатын шара. Әрбір азамат заңды жолмен, адал еңбегімен ғана мемлекеттік қызметтерді алу қажеттігін түсінуі тиіс.
Бұл іс прокуратураның сыбайлас жемқорлыққа қарсы іс-қимыл, азаматтардың құқықтарын қорғау және мемлекеттік органдар қызметінің заңдылығын қамтамасыз ету бағытындағы тиімді жұмысын айғақтайды.
