Суреттің мақалаға қатысы жоқ.Шымкент қаласында прокуратура бастамасымен жүзеге асып жатқан «Құқықтық тәртіп және тазалық» жобасы нақты нәтижелерін көрсетуде. Жобаның негізгі мақсаты – құқық бұзушылықтардың алдын алу және қоғамдық тәртіпті қамтамасыз ету. Бұл бағытта қалалық коммуналдық қызмет өкілдері – «Тазалық сақшылары» құқық қорғау органдарына белсенді қолдау білдіруде.
Осындай бірлескен әрекеттердің нәтижесінде есірткі құралдарын жарнамалайтын интернет-дүкен сілтемелерін қала көшелеріне жазып жүрген 28 жастағы Шымкент тұрғыны анықталып, ұсталды.
Қылмыстық схема қалай әшкереленді?
Тергеу барысында белгілі болғандай, азамат қаржылық қиындықтарға тап болған сәтінде Telegram мессенджері арқылы қосымша табыс табу туралы ұсынысқа келісім берген. Белгісіз тапсырыс берушіден алған нұсқауларға сәйкес, ол трафарет пен аэрозольді бояу арқылы түнгі уақытта қала көшелеріне тыйым салынған интернет-сайттардың сілтемелерін жазып отырған.
Бұл әрекеті үшін ол Қазақстан Республикасы Қылмыстық кодексінің 299-1-бабы 2-бөлігі (есірткі құралдарын, психотроптық заттарды және сол тектестерді жарнамалау немесе насихаттау) бойынша айыпталып, сот үкімімен 3 жыл 3 ай мерзімге бас бостандығынан айырылды.
Прокуратура ескертеді: есірткі жарнамасы – бұл жай жазба емес, ауыр қылмыс!
Қала тұрғындарына қоғамдық тәртіпке бейжай қарамауға шақырамыз. Егер сіз күмәнді жазуларды, жарнамаларды немесе есірткіге қатысты насихатты байқасаңыз, дереу «102» нөміріне хабар беріңіз. Сіздің қырағылығыңыз – өзіңіздің де, жақындарыңыздың да қауіпсіздігіне үлес.
Прокуратура – құқықтық тәртіптің тірегі
Бұл оқиға – прокуратураның азаматтардың құқықтары мен қауіпсіздігін қорғаудағы белсенді және жүйелі жұмысының нақты дәлелі. «Құқықтық тәртіп және тазалық» жобасы қоғамның құқықтық санасын арттырып, жастар арасында есірткіге қарсы мәдениетті қалыптастыруға бағытталған. Әрбір азамат өз ортасында құқық бұзушылықтарға жол бермеуге мүдделі болуы тиіс.
Есірткі – болашаққа балта шабу.
Заңды бірге орнатайық!
