Абай ауданы прокуратурасы заңдылықты қамтамасыз ету, қоғамдық тәртіпті сақтау және азаматтардың қауіпсіздігін арттыру бағытында пәрменді шаралар қабылдауда. Осы мақсатта «Заң мен Тәртіп» тұжырымдамасын іске асыру аясында Шымкент қаласының әуежай аумағында рейдтік іс-шара ұйымдастырылды. Шараға аудан прокуратурасы мен жергілікті полиция қызметкерлері жұмылдырылды.
Рейд барысында Әкімшілік құқық бұзушылық туралы Қазақстан Республикасы Кодексінің 449-бабына (қоғамдық орындарда мазалау) сәйкес бірқатар заң бұзушылықтар тіркелді. Атап айтқанда, жолаушыларға тіркеусіз және арнайы рұқсатсыз тасымалдау қызметтерін ұсынған жеке тұлғалар анықталып, оларға қатысты тиісті әкімшілік шаралар қабылданды.
Прокуратураның бастамасымен құқық бұзушылықтардың алдын алу және көліктік тәртіпті қамтамасыз ету мақсатында әуежай аумағында техникалық реттеу құралдары орнатылды. Атап айтқанда, бақылаусыз кіру мен шығуды шектеу үшін шлагбаум мен жол белгілері қойылып, тәртіп сақшыларына қоғамдық қауіпсіздікті қадағалауға мүмкіндік туды.
Абай ауданының прокуратурасы азаматтарға қоғамдық орындарда белгіленген тәртіпті бұзуға болмайтынын ескертеді. Қоғамдық орынды мазалағаны үшін Қазақстан заңнамасында әкімшілік жауапкершілік қарастырылған — бұл ескерту жасау немесе 5 айлық есептік көрсеткішке дейін айыппұл салу түрінде жазаланады.
Прокуратура қызметі – заңдылық кепілі
Прокуратура – заң үстемдігін қамтамасыз ететін, азаматтардың конституциялық құқықтары мен бостандықтарының сақталуын қадағалайтын негізгі мемлекеттік орган. Қоғамдық тыныштықты қамтамасыз ету, қауіпсіз ортаны қалыптастыру және заң бұзушылықтардың алдын алу – прокуратураның күнделікті және аса маңызды міндеттерінің бірі. Осы орайда жүргізілген рейдтік іс-шара прокуратураның құқықтық тәртіпті сақтау жолындағы мақсатты әрі жүйелі жұмысын көрсетеді
