ҰЛЫ ОЙШЫЛДЫҢ РУХЫМЕН ЖҮЗДЕСКЕН КҮН

Қазақтың кемеңгері Абай Құнанбайұлының 180 жылдығына орай Шымкентте рухани мереке өтті. Аталмыш шара қала әкімі бастаған зиялы қауым өкілдерінің Абай саябағында ұлы ақын ескерткішіне гүл шоқтарын қою рәсімінен басталды. Бұл – ұлт тарихында өшпес із қалдырған дана ойшылдың асыл мұрасын ұлықтау мен мәңгілік тағзымның айқын көрінісі.

Мерекелік рәсім жас ұрпақты білімді, еңбекқор әрі адал болуға үндеп, ұлттың жаңа бейнесін қалыптастыратын асыл қасиеттерді кеңінен насихаттады. Отанға деген сүйіспеншілік пен ел мүддесіне адал қызмет етудің жарқын үлгісі көрсетілді. Сондықтан Абай мұрасын тану, таныту және шығармаларын терең зерттеу айрықша маңызды. Бүгінгі салтанатты шараның басты мақсаты да – осы. Айта кетейік бұл айтулы шараға қала әкімі мен зиялы қауым өкілдері, қоғам қайраткерлері, сондай-ақ белсенді жастар мен қала тұрғындары қатысып ұлы ақынға тағзым етті.

Аталмыш шара аясында бүлдіршіндер ұлы Абайдың өлеңдерін мәнерлеп оқып, көрермендерге ерекше әсер сыйлады. Сондай-ақ бұл ерекше сәтке куә болу үшін Ташкенттен арнайы келген қонағымызда да ақын рухына тағзым етіп, мерекелік жиынның мәнін арттырды. Мейманның айтуынша, өз елінде де ұлы Абайдың шығармалары үлкен қызығушылықпен оқылып, құрметпен дәріптеледі. Ол ақын мұрасының тек қазақ халқы үшін ғана емес, бүкіл түркі жұрты мен адамзат үшін құнды рухани қазына екенін атап өтті.

Абайдың мол мұрасы – уақыт пен кеңістіктен биік, ұрпақтан ұрпаққа жалғасатын асыл қазына. Оны дәріптеу – өткенге тағзым, болашаққа аманат, ал шаһарда өткен бұл мерекелік күн – хакім мұрасын ұлықтаудың мәнді көрінісі болды.