МЕГАПОЛИС ҚҰРАҚШЫЛАРЫ ГИННЕС КІТАБЫНА ЕНДІ

 Шымкенттік құрақшылар Гиннес рекордтар кітабына енгізілді. Осыдан бір ай бұрын Алматы қаласында өткен «Alaman quraq 2025» жобасында қатысқан олар өз өнері мен шеберліктерінің арқасында жүзден жүйрік, мыңнан тұлпар шыққан болатын. Қазақтың төл өнерін ұлықтап жүрген шеберлерге арнайы марапат табысталды. Құрақ құрау – өнердің сарқылмас қайнар көзі. Дәл осы тақырыпта өткен аламан құрақшылар көрмесінде шеберлер өз өнерлерін ортаға салды. Қазақтың құрақ өнері – ұлттық қолөнердің айшықты бөлігі. Бүгінде бұл өнерге үлкендерден бөлек жастарда қызғушылық танытып қолөнермен айналысып келеді. Жас талғамайтын бұл қолөнер туындысы халықаралық деңгейде мойындалуда. Бұған дәлел – Алматыда өткен құрақшылар сайысы. 660 құрақ көрпеше мен ұлттық нақыштағы «Алма» жастық үлгілері ұсынылған көрмеде шымкенттіктер де өз өнерлерін көрсетіп, халқымыздың көне өнерін заманауи деңгейде паш еткен еді. Көрме орталығында өткен құрақшылардың туындылары арасында құрақ көрпеден бөлек ұлттық нақыштағы киім үлгілері де көрермен назарына ұсынылды. Сонымен қатар, ән мен би сахналанып, шараға ерекше сән берді.Шара барысында 100-ге жуық құрақшы марапатқа ие болды. Еңбегі еленген шеберлер қуаныштарымен бөлісті. Әдет-ғұрып және салт-дәстүр орталығыныңұйымдастыруымен өткен мұндай басқосулар ұлттық өнердің дамуына серпін беріп, оны әлемдік деңгейде насихаттауға мүмкіндік ашады.