СПОРТШЫЛАР ТМД ТУРНИРІНДЕ ЕЛ НАМЫСЫН ҚОРҒАЙДЫ

Шымкентте әскери қызметші-спортшылар беделді халықаралық мәскеуде өтетін жауынгерлік самбодан армия турниріне қарқынды дайындық жүргізуде. Бұл сайыс ТМД елдерінің ойындары аясында ұйымдастырылып, әскери қызметшілер арасында өтеді. Дүбірлі додада бұрынғы Кеңес Одағы құрамында болған мемлекеттердің таңдаулы спортшылары бас қосады.

Қазақстан құрамасы бұл жарысқа барынша дайын. Спортшыларымыз Ресей астанасында өтетін байрақты бәсекеде ел намысын абыроймен қорғауға тас-түйін әзір. Құрама сапы Қарулы күштердің Спартакиадасы мен ҚР Қорғаныс министрлігі Спорт комитеті – Орталық армия спорт клубы ұйымдастырған жарыстарда көрсеткен нәтижелер негізінде жасақталды.

Команда құрамында өз ісінің майталмандары жиналған. Армиялық құрама жеті салмақ дәрежесінде өнер көрсетіп, халықаралық деңгейде Қазақстан Республикасы мен Қарулы Күштерінің намысын қорғауды көздеп отыр.  Бұл дүбірлі дода – мемлекеттер арасындағы ынтымақтастықты арттырып, достық байланыстарды нығайтатын маңызды спорттық алаң болмақ.