ЭТНОМЕДИАЦИЯ — КЕЛІСІМГЕ БАСТАР ЖОЛ

Шымкенттегі Құқық қорғау және татулық орталығында екі айда 336 мәселе шешілген. Осыған орай, Этномедиация кеңесінің мүшелері және кәсіби медиаторлардың қатысуымен Ашық есік күні өтті. Іс-шараның басты мақсаты – қала тұрғындары арасында татулық пен келісімді нығайту. Ашық есік күні аясында тұрғындар жеке құқықтық мәселелерден бастап, отбасылық даулар, мүліктік келіспеушіліктер мен тұрмыстық қатынастарға дейінгі түрлі мәселелерін көтерді. Кеңеске келген әрбір азамат өз сауалын қойып, медиаторлардан кәсіби бағыт-бағдар алып, құқықтық көмекке жүгінді.

Айта кетейік, этномедиациялық орталық ашылғанына небәрі екі айға жуық уақыт өтсе де, осы қысқа мерзім ішінде 336 түрлі мәселе бойынша кәсіби қолдау көрсетіліп, тараптардың өзара келісімге келуіне ықпал еткен. Бұл – орталық жұмысының нәтижелілігін және қоғамда мұндай қызметтерге деген сұраныстың жоғары екенін дәлелдейді.

Сондай-ақ, жиын барысында тұрғындар тарапынан айтылған ұсыныс-пікірлер де назардан тыс қалмады. Ал этномедиация кеңесі өз кезегінде бұл жұмысты жүйелі түрде жалғастырып, қала тұрғындарының құқықтық мәдениетін көтеруге өз үлесін қоспақ.