«МЕКТЕПКЕ ЖОЛ» АКЦИЯСЫНА МИЛЛИАРДТАҒАН ҚАРЖЫ БӨЛІНДІ

Шымкент қаласында өзекті мәселелер жиі көтеріліп, кей тұста қатаң сынға ұшырап жатады. Оған себепте жоқ емес. Бүгінде балалардың жазғы демалысын тиімді ұйымдастыру, қоғамдық көлікті жақсарту мен азық-түлік бағасын тұрақтандыру – бағытында кешенді шаралар атқарылып жатыр. Мәселен, жаңа оқу жылына дайындық аясында «Мектепке жол» акциясына 2,6 миллиард теңге бөлінген.Бұл туралы баспасөз мәслихатында мәлімделді.

Жазғы демалыста әлеуметтік жағдайы төмен және көпбалалы отбасылардан шыққан сегіз мыңға жуық бала қала сыртындағы сауықтыру лагерлерінде тынығуда. Бұл — мемлекет тарапынан балалардың қауіпсіз әрі пайдалы демалысын қамтамасыз етуге бағытталған қолдау. Ал биыл мектеп табалдырығын алғаш аттайтын оқушылар саны 27 546 мыңға жетеді деп күтілуде. Қазірдің өзінде 21 097өтініш қабылданған. Өтініштердің басым бөлігі egov.kz порталы арқылы электронды түрде түсіп отыр. Сондай-ақ әкімдік ата-аналарға цифрлық өтініш берудің тиімділігін еске салды.

Әлеуметтік қолдаумен қатар, жұмыспен қамту бағытында да жүйелі жұмыстар жүргізілуде. Жыл басынан бері 770 адам қысқа мерзімді оқыту курстарына жіберілген. Оның 610-ы колледждер мен оқу орталықтарында білім алып жатса, қалғаны жұмыс беруші мекемелер базасында өндірістік тәжірибеден өтуде.Қоғамдық көлік — бақылауда. Шымкентте аялдама инфрақұрылымы жаңартылып, қоғамдық көліктерге дыбыстық хабарлау жүйесі кезең-кезеңімен енгізілуде. Биылдың өзінде 300-ге жуық жаңа аялдама павильоны орнатылып, ескілері жаңартылған. Ал, 1 003 автобус дыбыстық хабарлау жүйесімен жабдықталды. Жыл соңына дейін тағы 117 көлікке орнату жоспарланған. 2025 жылдың соңына дейін бұл жүйе барлық бағытта толық іске қосылады деп күтілуде.

Тамыз айы тағылымы терең іс-шараларға толы болмақ. Шымкент қаласында бірқатар мәдени, әлеуметтік және рухани бағыттағы шаралар ұйымдастырылады. Соның ішінде ерекше атап өтерлік маңызды күн — ұлы Абай Құнанбайұлының туған күні. Биыл қазақтың дана ойшылы, ақын және ағартушысы Абайдың 180 жылдығы еліміздің барлық өңірінде кең көлемде аталып өтеді.