“ЭКО ШИНА” ЖОБАСЫ ЖҮЗЕГЕ АСТЫ

Қазақстанда қалдықтарды басқару жүйесі жаңа деңгейге көтерілуде. Бұл бастамаға Мемлекет басшысы Қасым-Жомарт Тоқаевтың тапсырмасы негіз болды. 2024 жылғы ақпанда өткен кеңесте Президент еліміздегі экологиялық ахуалды жақсартуға ерекше көңіл бөлуді тапсырған болатын. Осыған сәйкес, Үкімет пен жергілікті әкімдіктер «Жасыл даму» АҚ арқылы қалдықтарды қайта өңдеу саласына нақты қадамдар жасауда.

Шымкент қаласынан ұсынылған «ЭКО Шина» жауапкершілігі шектеулі серіктестігінің жобасы – осы бастаманың нақты нәтижесі. Жоба аясында ескі автокөлік шиналарын қайта өңдейтін зауыт жаңғыртылып, өндіріс қуаты жылына 6 мыңнан 10 мың тоннаға дейін ұлғайтылмақ. Бұл – өңірдегі экологиялық қауіпсіздікке тікелей әсер ететін маңызды қадам. Жобаның жалпы құны – 629 миллион теңге. Оның ішінде 500 миллионы «Өнеркәсіпті дамыту қоры» арқылы қайтарымды және жеңілдетілген шартпен берілген. Қаржыландыру шарттары қолайлы – 3%-дан аспайтын жылдық сыйақымен, 15 жылға дейінгі мерзімге. Қазір кәсіпорын заманауи құрал-жабдықтарды сатып алып, іске қосу жұмыстарын бастап кеткен.

Жоба қалдықтарды жоюмен қатар, одан пайда табуға мүмкіндік береді. Зауыт резеңке үгіндісі, техникалық көміртек, регенерат пен мазут өндіреді. Бұл өнімдер құрылыс, жол жөндеу, көгалдандыру сияқты бірнеше салада кеңінен қолданылады. Сонымен қатар, өндіріс қалдықсыз әрі қоршаған ортаға зиянсыз технологиялармен жабдықталады. «ЭКО Шина» жобасының тағы бір маңызды артықшылығы – жаңа жұмыс орындарының ашылуы. Бұл – өңір тұрғындары үшін қосымша әлеуметтік мүмкіндік. Ал ұзақ мерзімді перспективада кәсіпорын жасыл экономиканың тұрақты дамуына серпін беретін өндіріс орындарының біріне айналуы мүмкін.

Экологиялық, экономикалық және әлеуметтік маңыздылығы жоғары бұл жоба — мемлекет пен бизнестің тиімді әріптестігінің нақты үлгісі. Қайта өңдеу ісі дамыған сайын, табиғатты қорғау, қоршаған ортаға деген жауапкершілік те арта түседі. «ЭКО Шина» осы жолда алғашқы әрі сенімді қадам жасап отыр.