ҚАРТТАРҒА АРНАЛҒАН ЗАМАНАУИ ОРТАЛЫҚ

Шымкент қаласында «AMANAT» партиясының бағдарламасы аясында 2023 жылдан бері  «Ізетті зейнеткер» орталығы жұмыс істейді. Бұл орталық зейнеткерлерге әлеуметтік қолдау көрсетіп, ардагерлердің ризашылығына ие болып отыр. Аталған орталыққа Мәжіліс депутаты Данабек Исабек арнайы келіп, мекеме қызметімен танысты. Халық қалаулысы орталықтың маңыздылығын айтып, атқарылып жатқан жұмысқа жоғары баға берді.

 Іс-шараға «AMANAT» партиясының Шымкент қалалық филиалы мен мәслихат депутаттары, аудандық бөлім басшылары және әлеуметтік қорғау саласының өкілдері қатысты. Алғашында 70 орынға есептелген «Ізетті зейнеткер» орталығы бүгінде бір мезетте 120 зейнеткерді қабылдай алады. Бұл мекеме қысқа мерзімді демалыс пен оңалту қызметтерін ұсынатын бірегей орынға айналды. Жалпы аумағы 3 700 шаршы метрді құрайтын орталықта демалушылар үшін барлық жағдай жасалған.

Орталықта келушілер медициналық және әлеуметтік қызметтің толық спектрін қабылдай алады. Мекеме басшылығының мәліметінше, демалушыларға күніне төрт мезгіл ыстық тағам ұсынылады. Қариялардың көңілін аулап, оларға рухани қолдау көрсету — мекеме ұжымының басты қағидаларының бірі. Айта кетейік, «Ізетті зейнеткер» орталығына жолдама алу процесі толығымен цифрландырылған. Кезек күту жүйесі де онлайн түрде жүргізіледі. «AMANAT» партиясы қолға алған бұл орталық — қарттарымызға жасалып отырған нақты қамқорлықтың жарқын үлгісі. Мәжіліс депутатының айтуынша, елімізде осындай орталықтардың саны артып, әрбір зейнеткер лайықты демалыс пен ем-шараға қол жеткізе алуы тиіс.