ҚҰТҚАРУШЫЛАРҒА ЖАҢА ТЕХНИКА МЕН БАСПАНА

Шымкент қаласында Төтенше жағдайлар министрі Шыңғыс Әрінов пен қала әкімі Ғабит Сыздықбековтың қатысуымен маңызды іс-шара өтті. Бұл күні өңірлік төтенше жағдайлар департаментінің қызметкерлеріне заманауи 40 құтқару техникасы мен өрт сөндіру көліктері табысталып, 25 маманға жаңа баспананың кілтін табыстады.

Құтқару қызметінің тиімділігін арттыру мақсатында өңірге 40 бірлік заманауи құтқару және өрт сөндіру техникасы жеткізілді. Бұл – еліміздің оңтүстігіндегі төтенше жағдайлар қызметінің әлеуетін арттыруға бағытталған ең ірі техниканың бірі. Арнайы техника заманауи талаптарға сай жабдықталып, оқыс оқиғаларға жедел әрі тиімді әрекет етуге мүмкіндік береді.

Төтенше жағдайлар министрі салтанатты рәсімде құтқарушылардың еңбегіне жоғары баға беріп, бұл мамандықты беделді әрі ауқатты ету жолында жүйелі жұмыстар жалғасатынын айтты. Министр ел көлемінде құтқару саласын жаңғырту және әлеуметтік қолдау бағдарламалары кезең-кезеңімен жүзеге асатынын, бұл шаралар қоғамның сенімін нығайтып, қауіпсіздік деңгейін арттыратынын жеткізді.

Әлеуметтік қолдау мәселесі де назардан тыс қалған жоқ. “Qamqor” бағдарламасы аясында ТЖД-ның 25 қызметкері жаңа пәтер кілттерін  табыстады. Бұл бастама азаматтық қорғау саласында еңбек ететін мамандардың әлеуметтік жағдайын жақсартуға бағытталған қадам. Сонымен қатар,  Қазақстандық құтқарушылар қорының қолдауымен қызметкерлерге заманауи үлгідегі арнайы киімдер табысталды. Бұл – олардың жұмыс барысында қауіпсіз әрі ыңғайлы жағдайда қызмет атқаруына, сондай-ақ кәсіби бейнесін нығайтуға мүмкіндік береді.