ТҰРҒЫНДАРДЫҢ ҚАУІПСІЗДІГІ — БАСТЫ НАЗАРДА

Үшінші мегаполисте, 1 Мамыр көшесінде орналасқан екі қабатты тұрғын үйден өрт шығып, бірнеше отбасы далада қалды. Өкінішке орай, тілсіз жаудың салдарынан 19 пәтердің 11-і зардап шеккен. Көптеген тұрғындар баспанасыз қалса, бір адамның өмірі қиылғаны – қабырғаны қайыстырды. Осы оқиғаға байланысты қала әкімі арнайы қолдау көрсетіп, жапа шеккендерге жаңа тұрғын үйдің кілтін табыстайтынын айтты.

    Қайғылы жағдайдан кейін көп ұзамай Шымкент қаласының әкімі оқиға орнына барып, зардап шеккен тұрғындармен кездесті. Ол өрт болған аумақты аралап, бүлінген нысандарды көзбен көріп, тұрғындардың өтініш-тілектерін тыңдады. Кездесу барысында зардап шеккен азаматтарға қандай көмек көрсетілетіні айтылды. Ғабит Сыздықбеков ең алдымен тұрғындардың қауіпсіздігі мен әлеуметтік жағдайын қамтамасыз ету – жергілікті биліктің басты міндеті екенін атап өтті.

Қала әкімінің айтуынша, зардап шеккен отбасыларға тең дәрежелі, жайлы әрі қолайлы пәтерлер ұсынылады. Осы мақсатта Шымкент Сити және Тұран шағынаудандарында орналасқан бос пәтерлердің тізімі жасалып, нақты іріктеу жұмыстары жүргізілуде. Тұрғындарға әділ әрі ашық түрде пәтер үлестірілетінін жеткізді.

Әкімдік тарапынан зардап шеккендерге құқықтық, психологиялық және материалдық көмек көрсетілуде. Осы мақсатта арнайы жедел штаб құрылған. Тұрғындар биліктің әрекетәне қуанып, ризашылықтарын білдірді. Алдағы уақытта үй қауіпсіздігі мен өрттің алдын алу жұмыстарына басымдық беріледі. Бұл шаралар – тұрғындардың амандығын қамтамасыз етуге бағытталған маңызды қадам.