Шымкент қаласының жастары Ақтөбе қаласынан бастау алған «Ардагер өсиеті» республикалық жастар марафонынан жүлделі орындарға ие болып, туған өлкеге абыроймен оралды. Ауқымды патриоттық жоба Ұлы Жеңістің 80 жылдығына орай ұйымдастырылып, еліміздің түкпір-түкпірінен келген жастардың басын қосты.
Марафон Кеңес Одағының Батыры Әлия Молдағұлова атындағы мемориалдық кешеннен бастау алып, қатысушылар соғыс ардагерлерімен жүздесіп, олардың хаттары мен естеліктерін жинады. Бұл тарихи деректер кейін арнайы әзірленген «Батырларға тағзым» атты онлайн платформада жарияланып, марафон соңында жиналған материалдар музей қорына тапсырылады.
Марафон барысында әскери-патриоттық және зияткерлік сайыстар ұйымдастырылып, Қазақстанның барлық өңірінен келген жастар өзара бақ сынасты. Шымкент қаласының жастары бұл байқауларда ерекше белсенділік танытып, жоғары нәтиже көрсетті.
Атап айтқанда:
- «Жас сарбаз» әскери-патриоттық клубының Шымкент қалалық командасы жүлделі ІІІ орын иеленді;
- Сабыр Рақымов атындағы республикалық әскери колледждің тәрбиеленушілері – І орынға қол жеткізді.
Жеңімпаз жастар Шымкентке салтанатты түрде оралды. Оларды қалалық білім басқармасының өкілдері, ардагерлер, Қарулы күштердің ардагерлері, ата-аналар мен ұстаздар жылы ықыласпен қарсы алды. Салтанатты шараға ҚР Қарулы күштері ардагерлерінің республикалық қоғамдық бірлестігінің Шымкент қалалық филиалының төрағасы Серікбай Оңбаев қатысты.
Марафонға қатысқан «Арыстан» әскери-патриоттық клубының мүшесі Батырхан Байданов жарыстың өте тартысты өткенін, қатысушылардың бәрі де жеңіс жолында бар күш-жігерін салғанын атап өтті.
Шымкент қаласы білім басқармасының әдістемелік орталығының дене тәрбиесі пәні бойынша әдіскері Дәулет Құттиев бұл жеңістің тек спорттық не білімдік қана емес, рухани жетістік екенін айтты:
«Осындай республикалық жобалар жас ұрпақты ерлікке, отансүйгіштікке тәрбиелейді. Біздің жастардың жетістігі – табанды еңбектің, жан-жақты дайындықтың және елге деген сүйіспеншіліктің көрінісі», – деді ол.
«Ардагер өсиеті» марафоны – жас ұрпақтың санасына патриотизм мен тарихи жадыны сіңіруге бағытталған маңызды бастама. Шымкент жастарының бұл жеңісі – қала тұрғындары үшін зор мақтаныш, ал жас буын үшін үлгі.
