ЭНДЕМИЯЛЫҚ АЙМАҚ

Шымкент – аса қауіпті жұқпалы аурулар бойынша эндемиялық аймақтардың қатарында. Өткен жылдың дерегі бойынша қаладағы 11 елді мекен бұл тізімге енген. Аталған аймақтарда мемлекет қаржысымен залалсыздандыру жұмыстарының бірінші кезеңі жүргізілген. Бұл туралы өңірлік коммуникациялар қызметінде өткен брифингте айтылды. Кенелер арқылы таралатын жұқпалар, әсіресе көктем мен жаз мезгілінде белсенді түрде өршиді. Сондықтан қалада залалсыздандыру жұмыстары басталып кеткен. Бірінші кезең – аяқталды. Енді мамандар екінші кезеңге дайындалып жатыр.

Сақтықты талап ететін тағы бір ауру – Сібір жарасы. Бұл – адам мен жануарға ортақ, аса қауіпті жұқпалы ауру. Қоздырғышы топырақта ұзақ жылдар бойы сақталып, қолайлы жағдайда қайта белсенділенуі мүмкін. Ауру көбіне тері арқылы жұғады, кейде тыныс алу немесе асқорыту жолдары арқылы да берілуі мүмкін. Мамандардың мәліметінше, қалада соңғы жылдары адамдар арасында құтыру ауруы тіркелмеген. Бұл – профилактикалық шаралардың нәтижесі. Дегенмен, жануарлар арасында індет ошағы толығымен жойылды деуге әлі ерте. Былтырдың өзінде 5 жағдай тіркелген. Дәрігерлер тұрғындарға санитарлық талаптарды қатаң сақтауға кеңес береді. Белгісіз себеппен өлген малды тұтынбау, дер кезінде ветеринарға хабар беру – аурудың алдын алудың негізгі жолы.