Шымкент қаласында Халықаралық нашақорлыққа және есірткінің заңсыз айналымына қарсы күрес күніне орай профилактикалық іс-шаралар өтті, — деп хабарлайды Polisia.kz.
Шымкент қалалық Полиция департаментінің есірткі қылмысына қарсы іс-қимыл басқармасының қызметкерлері жазғы лагерьде демалып жатқан балалармен арнайы кездесу ұйымдастырды. Балаларға есірткі заттарының зияны мен олардан қалай сақтану керектігі туралы танымдық әрі қызықты форматта әңгіме жүргізілді.
Полиция қызметкерлері өз денсаулығына жауапкершілікпен қараудың, зиянды әдеттерден аулақ болудың және белсенді өмір салтын ұстанудың маңыздылығын атап өтті. Сондай-ақ бейтаныс адамдар ұсынған белгісіз заттардан бас тарту және ондай жағдайда не істеу керектігі жайлы түсінікті тілде ақпарат берілді. Кездесу жылы әрі достық атмосферада өтіп, балалар қызығушылықпен тыңдап, көкейлеріндегі сұрақтарын қойды. Шара соңында тәртіп сақшылары балаларға қауіпсіз әрі көңілді жазғы демалыс тіледі.
Осы күні қаладағы дендросаябақта “Спорт – есірткіге қарсы” ұранымен кең ауқымды бұқаралық жүгіру шарасы ұйымдастырылды. Іс-шараға қала тұрғындары, спортшылар, полиция қызметкерлері, еріктілер мен белсенді жастар қатысты. Жүгірудің басты мақсаты – салауатты өмір салтын насихаттап, есірткі қылмыстарының алдын алу.
Жүгіру қашықтығы 5 шақырымды қамтыды. Қатысушылар мәре сызығын бағындырып, өз мүмкіндіктерін сынады. Спорттық шара барысында қатысушыларға есірткінің зияны және оның қоғамға тигізетін қаупі жөнінде ақпарат берілді. Белсенділік танытқан азаматтар арнайы марапаттарға ие болды.
Ұйымдастырушылардың айтуынша, мұндай шаралар жастар арасында спортқа деген қызығушылықты арттырып, зиянды әдеттерден бойын аулақ ұстауға ықпал етеді.
