«Адал адам – Адал еңбек – Адал табыс» . Дәл осы тақырыпта Сыбайлас жемқорлыққа қарсы агенттік пен қала прокуратурасы ұйымдастырған дөңгелек үстел өтті .Жиын барысында қоғамдағы әділдік пен тазалық қағидаттарын қалыптастыру мәселесі талқыланды. Бұл шараның негізгі мақсаты – қоғамда адал еңбек мәдениетін қалыптастырып, парасаттылық пен әділдік құндылықтарын дәріптеу. Сондай-ақ жастардың бойына еңбекке деген дұрыс көзқарас пен жауапкершілік ұстанымын сіңіру. Жиынға мемлекеттік органдардың өкілдері, қоғам белсенділері, ардагерлер, дін қызметкерлері, өнер, спорт және еріктілер ұйымдарының мүшелері қатысып, адалдық жайлы келелі ой, нақты ұсыныстарын ортаға салды.
Шымкент қаласы прокуратурасының Мемлекеттік айыптауды қолдау және апелляциялық сатыға қатысу басқармасының бастығы Нұржан Серікбаев дөңгелек үстелде сөз алып, адал жол – тек заңнан қорқу емес, ол ең алдымен иман мен ар-ұяттың белгісі екенін атап өтті. Сонымен қатар, Президенттің заң мен тәртіпті басты қағида ету туралы тапсырмасы – барша қоғамға ортақ міндет екенін жеткізді. Жиында алғашқы болып құқық қорғау органдарының өкілдері сөз алып, адалдық пен заңға құрметті қалыптастырудағы өздерінің рөлі мен жауапкершілігін атап өтті. Олар қоғамдағы тәртіп пен әділеттілікті сақтауда құқықтық жүйенің маңыздылығын жеткізіп, парасаттылықты насихаттаудың алғышарттары туралы айтты. Сонымен қатар, еріктәлер де қоғамдық сананы жақсартудағы рөлі ерекше екенін атап өтіп, бірлескен күш-жігер арқылы адал еңбек мәдениетін дамыту қажеттігін мәлімдеді. Дөңгелек үстелде барлық сала өкілдері бірлесіп, әділдік пен адалдық қағидаттарын кеңінен таратып, күш салуға ниетті екенін білдірді. Бұл бағыттағы жұмыстарды жалғастыру – ел болашағына жасалған маңызды инвестиция болып табылады.
