ҮЗДІК ЖЕТЕКШІЛЕР МАРАПАТТАЛДЫ

Қаламызда «NURAY ART FEST» өнер байқауының 10 айлық қорытындысы өтті. Бас жүлде иегері 10 миллион теңгеге жуық тұратын темір тұлпарды қанжығасына байлап, өнер додасында жеңіске жетті. Халықаралық көпжанрлы балалар мен жасөспірімдер арасындағы өнер байқауы ешқандай мемлекеттік қолдаусыз, демеушісіз ұйымдастырылды. Барлық шығын – байқау директорының жеке қаражатынан қаржыландырылған. Мұндай ауқымды жобаны өз күшімен жүзеге асырып, жас өнерпаздарға үлкен мүмкіндік сыйлаған ұйымдастырушылардың еңбегі көпшіліктің жоғары бағасына ие болды.

Байқау – мемлекеттік емес, таза коммерциялық жоба. Ал, байқауға төленген жарна концерт залының арендасы, техникалық жабдықтар мен ұйымдастыру шығындарына бағытталды. Жоба авторларының басты мақсаты – өнерлі өрендерге мүмкіндік беру ғана емес, жетекшілердің де қажырлы еңбегін елеусіз қалдырмау. Жыл бойы елдің түкпір-түкпірінен 200-ден аса жетекші мен мыңдаған өнерпаз қатысқан байқауда, қорытынды кезеңге 40 жетекші іріктеліп шақырылып, олардың ішінен үздік бестігіне ауқымды сыйлықтар табысталды. Бас жүлде иегеріне темір тұлпар беріліп, қатысушылардың қуанышын еселеді. Байқау – тек таланттар алаңы ғана емес, сонымен қатар шынайы еңбектің, табандылық пен сенімнің нәтижесі екенін дәлелдеді.

Байқау барысында ән, би, актерлік шеберлік, дәстүрлі өнер, аспаптық орындау мен бейнелеу өнерінің түрлі жанрларындағы өнерпаздар сынға түсті. Сайысқа 7 мәрте қатысқан шәкірттердің жетекшілері шетелге тегін жолдаманың иегері атанса, 150 оқушыны ертіп келген ұстазға да ерекше марапат ретінде шет елге саяхат тарту етілді. Ал 100 бала дайындаған ұстазға арнайы төсбелгі мен ақшалай сыйлық табысталды.Қордай ауданынан келген жетекші Бану Тұрғымбаева 480 балмен топ жарып, байқаудың бас жүлдесін иеленді. Ұзақ уақыт еңбектеніп, шәкірттерінің шығармашылығын шыңдаған ұстаз бұл жеңісі арқылы өзгелерге үлгі бола білді. Оның табандылығы мен кәсібилігі байқауда жоғары бағаланып, басты марапатқа лайық деп танылды.