Шымкент қаласы шахмат әлемінің жұлдыздары мен шахмат сүйер қауым өкілдері бас қосқан жерге айналды. Себебі мегаполисте бірнеше шахмат турнирі қатар өтуде. Оның ішінде Қазақстан балалар кубогының 6-шы әрі финалдық кезеңі және тұңғыш рет қаланың 1-ші Ашық кубогы ойнатылды. Қос кубоктың ашылу салтанатына KazChess федерациясының басшылығы, шахмат сүйер қауым, 10 жасқа дейінгі 163 жас шахматшы және 14 жасқа дейінгі 128 жас өрендер қатысып, бақтарын сынады. Ал, жарыстың жалпы жүлде қоры 3 миллион теңгені құрайды.
Әр жарыстың 9 туры “Көрме” орталығында 1 қарашаға дейін күн сайын өтеді. Бұдан бөлек, бұл шарада мемлекеттік қызметшілер арасында блиц-турнир де ұйымдастырылды. Бұған дейін кубоктың бес кезеңі Тараз, Қызылорда, Қостанай, Атырау мен Павлодарда өтті. Балалар турнирі жүздеген қазақстандық шахматшыны дайындаған дарынды тәлімгер және педагог Вячеслав Владимирович Печерскийдің құрметіне арналған. Оның шәкірттерінің ішінде 2016 жылғы әуесқойлар арасындағы әлем чемпионы Жұбан Биғабылов және Қазақстанның рейтинг көшбасшысы, гроссмейстер Ринат Жұмабаев бар.
- Бүгін Шымкентте өте үлкен жарыс басталып жатыр. VI Қазақстан Республикасы балалар кубогы. Шамамен 300-ге жуық бүлдіршіндеріміз жарысқа қатысуда. Еліміз бойынша 6 рет осындай үлкен жарыстарды өткізіп, ең соңында финал өткіземіз. Жалпы Шымкентте қазіргі таңда шахмат ойыны жақсы дамып келеді. Жылдың басында мегаполисте ҚР-ның жарысын өткізген болатынбыз. Бүгінде үш жарысымыз қатарынан өтіп келеді. Бұл тек балалар арасындағы VI кубок қана емес, сонымен қатар осы жерде мемлекеттік қызметкерлердің арасында да шахмат жарысымыз өтуде. Сондай-ақ төртінші жарысымыз ол гроссмейстерлердің арасындағы “круговой жарыс” деп аталады. Оны да өткізіп жатқан жайымыз бар,- деді Қазақстан шахмат федерациясының атқарушы директоры.
Турнирдің жүлде қоры 3 миллион теңге, оның 1,2 миллион теңге жеңімпаз алады, 2-ші орынға шыққан шахматшыға 800 мың тг, ал 3-ші орын үшін – 500 мың, 4-ші орын үшін – 300 мың және 5-ші орынды иеленген жарысушыларға 200 мың теңге табыс етілді.
Шымкенттің 1-ші Ашық Кубогы – 2024. жылы KazChess өткізетін гроссмейстер нормасымен (GM) және халықаралық шебер (IM) нормасымен айналма жүйе бойынша өтетін 10 турнирдің бірі. Осындай әр турнирге еліміздің ересектер мен жасөспірімдер құрамаларының мүшелерінен, сондай-ақ басқа да қазақстандық және шетелдік шахматшылардан тұратын 10–12 ойыншы қатысты.
Айта кетейік, қаламызда 29 қазанда ФИДЕ әйелдер Гран-приінің 2-ші кезеңі өтеді.
«KazChess президенті Тимур Турловтың тапсырмасы бойынша, біз турнирлерді еліміздің барлық аймақтарында өткізіп, шахматқа барынша көп адамды тартып, жас шахматшыларға өз күштерін көрсетуге мүмкіндік береміз. Түрлі аймақтарда өткен Балалар Кубогы осыған жақсы дәлел. Алматыда қараша айының соңында өтетін финалда 6 кезеңнің қорытындысы бойынша ең көп ұпай жинаған шахматшылар сынға түседі», – деп атап өтті Гүлмира Даулетова.
Турнир B-ге Қазақстан чемпионы-2024 Нұрмұхаммед Елемес барлық 9 ойынды да жеңіп, тамаша нәтиже көрсетті. Екінші орынды астаналық Айсултан Бисалиев иеленді, ал үшінші орынға 7 ұпаймен Диас Аманбек жайғасты. Ал командалық есепте Астана командасының жас шахматшылары Малика Жаппарбекова, Ақерке Молдағали, Айсултан Бисалиев және Елизавета Ледникова жеңіске жетті.
Үшінші мегаполисте әлемнің 10 үздік шахматшысы қатысатын ірі халықаралық турнир өткізу – дүниежүзілік шахмат сахнасындағы Қазақстанның атқаратын рөлі мен алатын орнын нығайтудың тағы бір тамаша мүмкіндігі. Сонымен қатар, дәл осы жерде Балалар Кубогының финал алдындағы кезеңін және маңызы зор айналма турнирді ұйымдастыру зияткер ұлтты қалыптастыруға көмектесетін осындай игілікті ойынға жол ашады.
