Қала әкімі Ғабит Сыздықбеков Әлем чемпионатының жүлдегері Талғат Орынбасар мен жаттықтырушысы Самат Сапишевті қабылдады.
Кездесу барысында Әлем чемпионатының жүлдегері өзінің алдағы жоспарларымен бөлісіп, қала әкімі тарту еткен алғыс хаты мен арнайы сыйлықтарын қабыл алды.
Айта кетейік, қазан айының 1-6 аралығында Тәжікстан Республикасы Душанбе қаласында өткен дзюдодан жастар арасындағы Әлем чемпионатына 68 елден 541 жас татами шеберлері бақ сынады. ҚР Ұлттық құрама сапында 19 спортшы өз өнерлерін көрсетті.
Оның ішінде Шымкент қаласынының атынан 60 келіге дейінгі салмақта Талғат Орынбасар жарыс жолына шықты.
Жарыс жолындағы жерлесіміздің қарсыластары, Талғат Орынбасар бірінші айналымда бос болды, екінші айналымда Сербия елінің дзюдошысы Матич Жеремикпен кездесіп, вазари ұпаймен жеңді. Үшінші айналымда Қырғыз елінің палуаны Адис Орозмаматовты иппон ұпаймен жеңді. Төртінші айналымда Тәжікстан елінің спортшысы Лойк Кудбудиновқа шидо ескертуімен есе жіберді. Жұбаныш белдесуінде Италия елінің спортшысы Вичензо Манферлоттиді вазари ұпаймен жеңіп, үшінші орын таласта Айзербайжан елінің спортшысы Низами Имрановты вазари ұпаймен қапыда қалдырды. Сөйтіп, Әлем чемпионатының қола жүлдегері атанды.
Сондай-ақ бұған дейін жерлесіміз 2022 жылы Босния-Герцеговина елі, Сараево қаласында өткен жасөспірімдер арасындағы Әлем чемпионатында 55 келіге дейінгі салмақта қола жүлдегер атанса, 2023 жылы Португалия мемлекеті Одивелаш қаласында өткен жастар арасындағы Әлем чемпионатында 60 келіге дейінгі салмақта қола медальді қанағат тұтты. Сонымен қатар, Азия чемпионатының және Кубогының жеңімпазы, ҚР чемпионатының бірнеше дүркін жеңімпазы.
«Айғақ»-ақпарат.
