Республика күні Түркістан төрінде тойланды. Жаса, жайна, Қазақстан атауымен өткен салтанатты шара тамырлы тарихымыздан сыр шертті. Егеменді еліміздің айбынын асқақтатты. Облыс әкімі 6 жылда түркі әлемінің астанасына айналған аймақтың жеткен жетістігі мен ілкімді істері жайлы баяндап, 60-қа жуық азаматты мемлекеттік наградамен марапаттады.
«Тұлғалар» прологымен ашылған мерекелік кеште ұлттық мерекенің мән-мазмұны жан-жақты айшықталды. Мемлекеттілігіміздің мәнін айшықтайтын Әнұран орындалып, оны шырқаған бүлдіршіндер патриоттық рухтың символындай көрінді. 
Салтанатты шараның басында Дархан Сатыбалды сөз сөйлеп, өңір тұрғындарын құттықтады. Сонымен қатар өңірде атқарылған жұмыстарға тоқталып, алдағы жоспарларды да баяндады.
Салтанатты жиында облыстағы бірқатар адамдардың еңбегі еленді. Ұлық мерекеге орай облыстың әлеуметтік-экономикалық дамуына үлес қосқан белсенді тұлғалар ІІІ дәрежелі «Барыс» ордені, «Парасат» ордені, «Құрмет» ордені, ІІІ дәрежелі «Еңбек даңқы» ордені, «Ерлігі үшін» медалі, «Ерен еңбегі үшін» медалі, «Шапағат» медалі, «Қазақсаттың еңбек сіңірген ұстазы» атағы сынды мемлекеттік наградалармен марапатталды. Мемлекет басшысы «еңбекқор адам», «кәсіби маман» бейнесіне баса мән беруде.
Шынайы, адал еңбегімен қоғамға сыйлы болған үлгілі тұлғалар мемлекетіміздің құрметіне бөленіп, елдің мақтанышына айналып келеді. Соның бірі – Әсет Қайыпбеков. Корпорация «Сити строй» ЖШС төрағасы еңбегін облыстың көркеюіне, қажыр-қайратын құрылыс, кәсіпкерлік, агро саланың дамуына арнаған азамат «Құрмет» орденімен марапатталды.
Ұзақ жылдардан бері ауыл шаруашылығының дамуына серпін беріп, өңір экономикасын жақсартуға үлес қосып келе жатқан «Бәйдібек несие» кредиттік серіктестігінің төрағасы Жазылбек Әбілдабектің еңбегі де «Құрметпен» бағаланды.
Мерекелік жиын концерттік бағдарламамен жалғасын тапты. Республикалық, халықаралық деңгейде өнер көрсетіп жүрген мәдениет саласының өкілдері өнер көрсетті. 1990 жылы Қазақ Кеңестік Социалистік Республикасының егемендігі жайлы Декларация қабылданды. Тарихи күн көңілге сеніп ұялатып, тәуелсіздігіміздің бастауы болды. Айтулы күн біраз жылдар бойы көлеңкеде қалып қойды. Дегенмен, 2022 жылдан бастап қайта тойлана бастады. Саяси және рухани мәні жоғары Республика күні құтты болсын!
