ӨРТ СӨНДІРУ ДЕПОСЫ АШЫЛДЫ

Құтқарушылар күні қарсаңында Шымкентте өрт сөндіру депосы ашылды. Жаңа өрт сөндіру бөлімі Сайрам тұрғын алабында салынды, ол 5 елді-мекен тұрғындарының өрт қауіпсіздігін қамтамасыз етеді.
Жаңа №6 өрт сөндіру бөлімінің құрылысы былтыр басталған. Жергілікті атқарушы билік тарапынан салынған нысанда 50 өрт сөндіруші қызмет атқарады. Салтанатты іс-шараға ҚР Төтенше жағдайлар вице-министрі Ерлан Нұрпейісов, Шымкент қаласы әкімінің орынбасары Айдын Кәрімов, азаматтық қорғау органдарының ардагерлері және басқа да құрметті қонақтар қатысты.
Аталған өрт сөндіру бөлімі заманауи техникалармен қамтамасыз етілген. Жаңа нысан өрт сөндірушілердің қызмет атқару және өрт қауіпсіздігін қамтамасыз ету жөніндегі жұмыстың тиімділігін арттыруға мүмкіндік береді. Екі қабатты өрт сөндіру депосында өрт сөндірушілер үшін барлық жағдай жасалған: оқу сыныбы, демалыс, жатын, ас бөлмесі, спорт және мәжіліс залы, техникалық үй-жайлар, сондай-ақ жеке құрамның кәсіби даярлығын арттыру үшін оқу-жаттығу мұнарасы және 100 метрлік кедергілері бар жолақ қарастырылған.
Айта кетейік, қазіргі таңда үшінші мегаполисті өрт қауіпсіздігімен 10 өрт сөндіру бөлімі қамтамасыз етеді.