Қала әкімінің көшпелі кездесуі қайта басталды. Бұл жолғы аралаудың алғашқы нүктесі Абай ауданында өтті. Ашық алаңдағы жиынға жиналған жұртшылық жергілікті жерінің мәселесін бүкпесіз жеткізді. Бұқараның бірі көп балалы отбасылардың үй алудағы қиындығын, коммуналдық төлемдердің қымбаттығын айтып шағымданса, бірі әкімге алғыс айтты.
Жаз мезгілінде жаңа форматпен басталған көшпелі кездесу жалғасын тапты. Абай ауданы Самал-2 шағын ауданының халқы әкімді Мұқағалидың «Үш бақытым» өлеңімен қарсы алды.
Ал, кездесуде айтылған актуалды мәселелерге тоқталсақ. Оңал Мұртазина коммуналдық төлемдердің қымбаттығына шағымданды. Өзге облыс-қалалармен салыстырғанда едәуір жоғары деген тұрғынның мәселесін тыңдаған әкім оның назарға алынатынын айтты.
Қала тұрғыны Кәрима Шермұхамедқызы әлеуметтік статусы бойынша осал топқа жататын отбасыларға баспананы алғашқы жарнасыз беру жайлы ұсынысын білдірді. Ал, тағы бір азамат көп балалы отбасыларға үйдің берілмейтінін айтады.
Самал-2 шағын ауданы тұрғындарының мәселесін тыңдап, жауап берген әкімге халық алғыс айтып, батасын берді. Келесі нүкте Шұғыла шағын ауданы. Мұндағы тұрғындар жер дауын көтерді. Жылдап жүріп тұрғызған тұрғын үйімізді сүріп тастамақшы деген халық баспанасының заңды құжаты барын алға тартты.
Жаңақұрылыс аумағынан келген тұрғындар қанша уақыттан бері жарық жоғын айтады. Осы кезге дейін Абай ауданының әкіміне бірнеше рет бардық деп күйінген жандарға әкім мәселені шешеміз деп, жауапты басқармаларға тапсырма берді.
Шұғылалық тұрғындар да Қошқар ата өзенінің мәселесін көтерді. Суы шипа, қастерлі саналатын өзеннің маңына жиналатын қоқыстың уақытылы тазаланбайтынын айтады.
Әлеуметтік мәселені Қызылжар шағын ауданының халқы жалғастырды. Тәуелсіздікке 20 жыл тұрғын алабынан келген азаматша ішкі көшелерде асфальттың жоқтығыг алға тартты.
Ал, Игілік елді мекенінде ойын алаңшасы жоқ екен. Балаларымыз көше бойында ойнайды, бір жағдай болып қала ма деп алаңдап отырамыз деген халық сол маңда арнайы бос жатқан орынның барын да айтты.
Көтерілген мәселеге Ғабит Сыздықбеков бастап келген әкімдіктің қызметкерлері жауап беріп, тұрғындардың уәжін түртіп алып жатты. Кей басқарма халықпен бірге мәселе қозғалған жерге барып, оқиғаны шешуге уағдаласты. Жалпы, қала әкімі Абай ауданында мұнан бөлек Жайлау, Алтынтөбе т.а. мен Ынтымақ шағын ауданында көшпелі кездесу өткізді.
