Шымкент Сатира театрының «Кербез келіндер» атты премьерасы көрермен назарына ұсынылды. Аталмыш пьесасы қалың көпшілікке ұнайтыны сөзсіз. Өйткені комедия жанрындағы бұл спектакль бүгінгі күннің өзекті тақырыбын көрсетуде.
Қазақ әу бастан келін деген атауды киелі санап, ұрпақ жалғастырушы ретінде мақтаныш санаған. Деседе, шаңырақтың берекесін молайтып, мерекесін келтіретін ене мен келін бүгін де тату ма, әлде қабақтары қату ма? Бойында бағзылықтың белгісі байқалатын ақ келіндер бүгінгі қоғамда өзгеше сипатқа енді ме? Дәстүр мен құндылықтардың шырақшысы, ұрпақ пен ұлттың тәрбиешісі саналатын келіндердің жолы құбылып бара жатқаны рас па? Жүзінен нұры төгілген, ізетті де инабатты, өн бойынан кішілік пен мейірімділік есіп тұратын, талшыбықтай майысқан келіндер қауымы бүгінде жауапкершіліктен қаша ма? Жас келін ата енемен бірге тұру міндетті ма? Егер осы сұрақтардың жауабын білгіңіз келсе «Кербез келіндер» комедиясына асығыңыз. Күле отырып, астарына бірге үңілейік.
Аталмыш қойылымға әртістер бір жарым ай дайындалған. Театр ұжымы спектакль арқылы көрерменге көтеріңкі көңіл-күйден бөлек, отбасындағы құндылықтарды, бүгінгі тұрмыс-жағдайды көрсетуге тырысты.
