ОРАЗ САРЖАНҰЛЫНА МЕМОРИАЛДЫҚ ТАҚТА ҚОЙЫЛДЫ

№52 мектеп-лицейінде Қатын көпір елді мекенінің «Құрметті азаматы» Ораз Саржанұлына мемориалдық тақта қойылды. Білім ордасының құрылысы мен елдің ертеңгі ұрпағының озық білім алуына өмір жолын арнаған ұстазды замандастары мен мектеп ұжымы еске алып, арнайы мерекелік шара өткізді. «Елмен бірге мәңгілік, рухың тұрар жаңғырып» атты тақырыпта өткен шара 1970-1997 жылдар аралығында аталмыш мектеп-лицейде басшылық қызмет атқарған, «Ы.Алтынсарин» және «КСР білім беру ісінің үздігі» төсбелгілерінің иегері Ораз Саржанұлына арналды. Концертке жиналған зиялы қауым өкілдері ұлағатты ұстазды еске алып, өнегелі өмір жолынан сыр шертті. Білім жолында еткен еңбегін жастарға үлгі етіп, ақын Құрал Көмек аға рухына өз өлең жолдарын арнады.
Әл-Фараби айтқандай «тәрбиесіз берілген білім адамзаттың қас жауы». Алғашқы еңбек жолын 1951-1952 жылдары Шардара ауданындағы Темрязев мектебінде математика пәнінің мұғалімі болып бастаған үздік ұстаз бала тәрбиесіне де ерекше көңіл бөлген. Еңбек жолында басшылық қызмет атқарып, аталмыш мектепке 27 жыл еңбегі сіңген, білім ордасының құрылысы мен ашылуына елеулі үлес қосқан ұстазға бүгінде арнайы кабинет ашылған. 6 ұл, 3 қыз өсірген ардақты әке өмір жолымен кейінгі ұрпаққа өнегелі із қалдырған. Арнайы мерекелік шараға Ораз Саржанұлының замандастары, зиялы қауым өкілдері, ардагер ұстаздар және мектеп ұжымы қатысты. Концертте ән айтылып, мектеп оқушылары мың бұрала би биледі және ұстазға арналып жазылған өлеңдер оқылды. Ораз Саржанұлына қойылған мемориалды тақта салтанатты түрде ашылып, гүл шоқтары қойылды. Айта кетейік, жиында ұлы отан соғысының ардагерлерін   тьде еске алып, арнайы гүл шоқтарын қойды.