БАТЫР АНАЛАР МАРАПАТТАЛДЫ

Батырда туған анадан, ақында туған анадан. 30 тамыз — Конституция күніне орай “Шымсити” саябағында мерекелік іс-шара қала тұрғындарының қатысуымен ерекше көңіл-күймен өтті. Жиын барысында көп балалы батыр аналар алтын, күміс алқалар мен марапатталып Абай ауданы әкімі арнайы құрмет көрсетті.

Конституция күні қарсаңында ұйымдастырылған концерт, Абай ауданының тұрғындарын ерекше қуанышқа бөледі. Шараға Шымкент қаласының әнші, бишілері өнер көрсетіп кештің сәнін келтірді. Мерекелік жиында халықты рухани байытатын түрлі мәдени бағдарламалар ұсынылып, дәстүрлі әндер айтылды. Сондай-ақ Абай ауданының әкімі көпшілікті келе жатқан Конституция күнімен құттықтап, тиімді құқықтық жүйені орнықтыру арқылы экономикалық өсімге және халықтың әл-ауқатының артуына қол жеткізілгенін атап өтті.

Аудан әкімі заң саласында қызмет атқарып жүрген бірқатар азаматтарға “Алғыс хатын” табыс етті. Сондай-ақ, жиында “Алтын алқа” және “Күміс алқа” иегерлері де құр қол қалмады.

Айта кетейік, 30 тамыз егеменді еліміздің тарихынан ойып тұрып орын алатын бүкілхалықтық мереке — Қазақстан Республикасының Конституциясы күні. Атаулы дата күні елде түрлі мерекелік шаралар, концерттер, ресми кездесулер мен дөңгелек үстелдер өткізіледі.