Шымкентте «Өрт қауіпсіздігі айлығы» жарияланды. Осыған орай, Еңбекші ауданы Төтенше жағдайлар басқармасы 2024-2025 жылғы жылу беру кезеңіне дайындық жұмыстарын бастап кетті. Жергілікті атқарушы органдар, газ шаруашылығының қызметкерлері және еріктілерден құралған мобильді топтар қала тұрғындары арасында түсіндіру жұмыстарын жүргізуде.
Жылу беру маусымы басталғанда тұрғын үйлер мен пәтерлердегі өрт оқиғалары арта түседі. Оның себебі, жылу беру жүйелерін пайдалану кезінде электр желісіндегі ток кернеуінің шамадан тыс көбеюі және өрт қауіпсіздігі талаптарының өрескел бұзылуы. Сондай-ақ, бұл кезеңде улы газбен улану факторлары жиі орын алады. Адам өміріне қауіпті газбен уланудың алдын алу үшін қарапайым қауіпсіздік ережелерін сақтаудың өзі аса маңызды.
Жылу беру маусымының қарсаңында жылыту құралдарын пайдаланған кезде өрт пен улы газдан улану оқиғаларының алдын алу және оларды болдырмау мақсатында Еңбекші ауданындағы Көксай мөлтек ауданында «Улы газдан сақ бол» тақырыбында үгіт-насихат жұмыстары жүргізілді. Жергілікті тұрғындардың мұржасы тазаланып, газосигнализатор орнатылды. Төтенше жағдайлар департаменті қызметкерлері тұрғындарға улы газ және тұрмыстағы өрт қауіпсіздігі бойынша ережелерді түсіндірді. Сондай-ақ, жергілікті халыққа пешті пайдаланудағы өрт қауіпсіздігі туралы нұсқамалар берілді.
Төтенше жағдайлар басқармасы жылыту маусымы басталғанға дейін үш айда бір рет жылыту пештерінің мұржалары мен құбырларын күйеден тазарту және түтін арналары өтетін шатырлардағы барлық мұржалар мен қабырғаларды әктеу маңызды деп атап өтті. Өрт қауіпсіздігі айлығы кезеңінде ТЖД мамандарының басты міндеті-жылыту маусымына сауатты және қауіпсіз дайындалу бойынша мәлімет беру. Әрбір адам өз бойында ұқыптылық пен сақтықты қалыптастыруы тиіс. Өрт қауіпсіздігінің қарапайым ережелерін сақтау өрттен сақтануға көмектеседі.
