Әскерде өзін үздік көрсеткен жауынгерлер енді жоғары оқу орындарында тегін білім ала алады. Қазақстан Республикасы президентінің 2024 жылғы 1 ақпандағы жарлығына сәйкес азаматтарды мерзімді әскерге шақыру 2 қыркүйек күні басталды. Осыған орай, Шымкент қаласында жастарды күзгі әскерге шақыру мәселесі бойынша жиын өтті.
Әскер — нағыз ер азаматтың сыналатын, шыңдалатын орны. Әскери міндетті өтеу — отанды сүюдің шынайы көрінісі. Шымкент Республикалық маңызы бар қала аталғаннан бері азаматтарды әскерге шақыру тапсырысы жылдан жылға артып келеді. Ағымдағы жылдың қыркүйек-желтоқсан айларында 1000 нан астам азаматты әскер қатарына шақыру жоспарланған. Жастар ҚР Қарулы Күштері, Мемлекеттік күзет қызметі, Ұлттық ұлан мен Төтенше жағдайлар министрлігі құрылымдарына шақырылады. Шымкент қаласы жергілікті әскери басқару органдарымен бірлесіп ҚР Қорғаныс министрлігі берген тапсырманы жақсы орындап келеді.
Деректерге сүйенсек, әскерге баратын жігіттер арасында этнос өкілдері аз. Мәселен, былтыр Шымкенттен әскерге аттанған сарбаздар арасында этнос өкілдері тек 20% — ды құрайды,шамамен 213 адам. Бұл халқының 30% ын этнос өкілдері құрайтын қаламыз үшін өте төмен көрсеткіш. Бүгінге жастарды әскерге баруға ынталандырудың түрлі жолдары қарастырылуда. Соның бірі — былтырдан бастап әскерге барғандар ҰБТ тапсырмай ақ жоғары оқу орындарына қабылданды. Осы мақсатта еліміздегі 70 тен астам оқу орындары 3000 нан астам орын бөлді. Бұл бастама биыл да жалғасын таппақ.
ҚР Президенті Қ.К. Тоқаев: «Әскер қатарында заң мен тәртіптің сақталуы – айрықша маңызды міндет. Жастар әскерге Отан алдындағы борышын өтеуге барады. Жас сарбаздарымыз өз міндетін алаңсыз орындауы үшін әскер қатарында, ең алдымен, темірдей тәртіп болуға тиіс. Қарулы күштер мен басқа да күштік құрылымдар осы талапты мүлтіксіз орындауы қажет.
Әр ата-ана әскерге кеткен баласын мемлекетке сеніп тапсырады. Сондықтан сарбаздардың денсаулығы мен қауіпсіздігіне, ең алдымен, армия басшылығы және құқық қорғау мекемелерінің басшылары жауапты»,-деп тапсырма берген болатын.
