ФОСФОРШЫЛАР САРАЙЫ ЖАҢА КЕЙІПКЕ ЕНЕДІ

1975 жылы тұрғызылған фосфоршылар сарайы бұзылады. «KazBuildExpert» жауапкершілігі шектеулі серіктестігінің сарапшы мамандары сәуір айында ғимараттың қазіргі жай-күйін, сенімділігі мен беріктігін тексеруге техникалық зерттеу жасап, осындай шешім қабылдайды. Оның орнына енді заманауи әрі жайлы ғимарат салынады. Ескеретін жайт, жаңа ғимаратта бұрынғы мәдениет үйінің қасбеті мен архитектуралық ерекшеліктері және атқаратын функциясы сақталмақ.

«Фосфоршылар» мәдениет сарайының ғимараты 1975 жылы тұрғызылған. Өкінішке орай, кеңестік кезеңдегі сәулет өнерінің осы бір туындысы — иесінің болғанына қарамастан, ұзақ жылдар бойы қараусыз қалды. Онымен қоса, ондағы құнды заттың барлығы тоналып, тіпті сарайға металл ұрылары қол сұққан. Олар бетондарды қиратып, арасындағы арматураларды кесіп алып, ғимараттың конструкциясына зиянын тигізген. Енді ескі мәдениет үй кешені сүріліп, орнына жаңа ғимарат соғылып, айналасы абаттан­ды­рылады. Бұл жөнінде Шымкент әкімдігі хабарлады.

2023 жылы 28 қыркүйекте қала әкімі Әл-Фараби ауданы тұрғындарымен кездесуде 89 жастағы ақсақал Өркен Әбдіреев Ғабит Сыздықбековтің назарын «Фосфоршылар» сарайының бүгінгі ахуалына аударуын және нысанның қайта жандануына үлес қосуын ұсынған болатын. Енді, міне тыл және еңбек ардагерінің сонымен қатар шаһар тұрғындарының арманы орындалып, жаңа ғимараттың құрылысы күз айында басталады деп жоспарлануда.

  Шымкент қаласының ішкі саясат және жастар істері жөніндегі басқармасы мен Төтенше жағдайлар департаменті қызметкерлері бірігіп, “Фосфоршылар сарайы” ғимаратынының бұзылатыны жөнінде түсіндіру жұмыстарын жүргізді. Сондай-ақ, мамандардың мәліметінше қорлардың қирауына байланысты төтенше жағдайлар саны соңғы 5 жылда 7 жағдайы тіркелген. Соңғы орын алған фактілердің бірі 2023 жылдың желтоқсан айында орын алған. Дәлірек айтсақ Фосфоршылар сарайының төбесі опырылып түсіп, бір адам қаза тапқан болатын.

    Айта кетейік, қала аумағында қазіргі таңда 107 ғимарат апатты деп танылған. Аталған ғимараттардың барлығы есепте. Құзырлы басқармамен оларды нығайту қалпына келтіру бойынша жоспарларға сәйкес жұмыстар жүргізілуде дейді, төтенше жағдайлар департаменті бастығының орынбасары.