Туризм және спорт вице-министрі Мирас Төлебаев Қызылорда облысы Байқоңыр қаласының тұрғындарымен есеп беру кездесуін өткізді. Жиынға турбизнес, спорт өкілдері қатысты.
Өңір тұрғындарымен кездесуде вице-министр министрліктің қазіргі қызметі, туризм және спорт, ойын бизнесі мен лотерея салаларындағы реформалар туралы баяндады. Мирас Төлебаев туризм саласы бойынша өңірде атқарылып жатқан жұмыстарға тоқталды.
«Туризм саласындағы маңызды мәселенің бірі туристік дестинациялардың инфрақұрылыммен қамтамасыз етілуі. Бүгінде «Батыс Еуропа – Батыс Қытай» автокөлік дәлізінің Қызылорда облысы бөлігінде 53 жол бойы қызмет көрсету кешені жұмыс жасауда. Оның ішінде, 49-ы немесе 92,4%-ы Ұлттық стандартқа сәйкес келеді. Туристердің жайлылығы мен қолайлы жүруін қамтамасыз ету үшін дестинациялардың, оларға барар маршруттардың инфрақұрылымдық желілерімен қамтылуына баса назар аударылуда», — деп атап өтті вице-министр.
Мирас Төлебаев мемлекеттік қолдау шараларында оң динамика байқалатынын жеткізді. Мәселен, 2023 жылы мемлекеттік қолдауға мақұлданған өтінімдердің көлемі 2022 жылмен салыстырғанда 8 есеге өскен. Сондай-ақ былтыр туристік қызметтің 9 нысаны бойынша шығындарды өтеу мақұлданды. Ал 2022 жылы тек бір ғана нысан мақұлданған болатын.
Аймақтың туристік мүмкіндігін арттыру және ішкі туризмді дамыту бағытында жаңа автовокзал пайдалануға берілді. Сыртқы туризмді ілгерілетуге мүмкіндік беретін Қорқыт ата әуежайының жаңа терминалы пайдалануға дайын.
Өңірде алғаш рет Қызылорда – Анталия бағытында халықаралық рейс ашылды.
«Тұрақты рейс Қызылорда және Анталия арасында аптасына бір рет сейсенбі күні қатынайды. Аталған бағыттың ашылуы әуежайдың ұшу географиясын кеңейтіп, шетелдік туристерді көптеп тартуға ықпал етеді», — деді Мирас Төлебаев.
Қазақстан Республикасы Туризм және спорт министрлігінің баспасөз қызметі.
