Мегаполисте заңсыз орналасқан кәсіпкерлік нысандар қала сыртына көшіріліп жатыр. Шахар басшысының тапсырмасына сәйкес қаланы көркейтуде кедергі келтіріп жатқан кәсіп иелеріне қала сыртынан 5 нүкте бекітілді. Кезекті кездесу Құрсай ш/а қарасты жаңа базарда өтті.
Кәсіп түбі-нәсіп. Өз ісін бастап, несібесін тауып жүрген кәсіпкер болғанымен, ол нысанның кесірі қала тұрғындарына тиуі мүмкін. Қала ортасында орналасқан құрылыс заттарын сататын сауда нүктелерінің кейбірі көлік қозғалысына және де жаяу жүргіншілердің жүріп тұруына кедергі келтіріп жатқаны жасырын дүние емес. Дәл осындай нысандардың барлығын қала сыртына шығару туралы жоспар жыл басында жасалған. Жоба жарым жолда қалмай жүзеге асып келеді. Мәселен, мегаполистегі 5 ауданның барлығына тиесілі аумақта базардың арнайы орындары салынуда. Соның бірі Тұран ауданына қарасты Құрсай шағын ауданындағы жаңа нысан кәсіп иелеріне таныстырылды.
Бұл тұста қала ортасында саудасын жасап, несібесін тауып отырған кәсіпкерлердің шағым айтары анық. Алайда, үшінші мегаполисті көркейтіп, көгалдандырып, жандандыру ісі тежелмеуі тиіс. Осылай деген жауапты мамандар арызын айтқан ағайынға жауап берді.
Негізінен Шымкент сөзінің мағынасы жасыл алқапты қала екендігін бір кездері тарихшылар жарыса айтқан болатын. Дегенмен соңғы жылдары дәл сол жасыл қаланы көгалдандыру ісі біршама тоқтап, суағарлардың барлығы жарамсыз күйге түскен. Бүгінде бұл іс қайта назарға ілікті. Яғни, мегаполис мэрінің тапсырмасына сай ескірген суағарлар жаңартылып, қоқысқа толған арық атыздар тазартылып, су жіберілуде. Осы ретте қала әкімінің кеңесшісі Бұхарбай Парманов әлгі кәсіптік нысандардың біршамасы жұмыс жүргізуге кедергі келтіріп жатқандығын да жасырмады.
Тұрғындармен жүздескен билік өкілдері жердің нысаналы мақсаты өзге құжатпен кәсіп ашқан кәсіп иелеріне 1-ші тамызға дейін жаңа нысанға орналасуға уақыт берді. Ал жоспарлы түрде жүргізілген жұмыстарға кедергі келтіріп, тәртіпке бағынбағандарға арнайы айыппұл салынып, немесе мәжбүрлі түрде көшірілмек.
