Қаратау ауданына қарасты Тұран-1 шағын ауданында мониторинг жұмыстары жүргізілді. Бұл ауданда «Таза Қазақстан» республикалық экологиялық акциясы басталғалы бір емес бірнеше рет тазалық жұмыстары жүргізілген болатын. Қазіргі таңда тұрғындар тазалықты басты назарға қойып, ауланы абаттандыру жұмыстарын жүйелі түрде жүргізіп отырады.
Мемлекет басшысының бастамасымен қолға алынған «Таза аула, Таза өлке, Таза ел!» жобасы еліміздің барлық өңірлерінде үздіксіз жүргізіліп келеді. Акция 5 аптаға бекітілгенімен, ел тұрғындары және тиісті басқарма қызметкерлерінің қолдауымен қазіргі уақытта жүйелі түрде жүргізіліп келеді. Тіпті қала, аудан, ауыл тұрғындары да бұл бастамаға білек сыбана кіріскен. Қаратау ауданына қарасты Тұран-1 мөлтек ауданының тұрғыны Ақмарал Сейдахметқызының айтуынша әрбір үй иелері қалтасынан қаражат бөліп, қоқыс тастайтын әрбір нүктеге бейнекамера орнатқан.
Жалпы бұған дейін Тұран-1 шағын ауданында бір емес бірнеше рет тазалық жұмыстары жүргізілген. Нақтырақ айтатын болсақ, Қаратау ауданы әкімдігі мен жайлы ортаны дамыту басқармасы қызметкерлері аудан тұрғындарымен бірлескен түрде ауланы қоқыстан тазарту, шөп қырқу, тал түптерін әктеу жұмыстарын жүргізген. Қазіргі таңда аудан тұрғындары тазалық жұмыстарын әдетке айналдырғандарын айтады.
Айта кетейік, алдағы уақытта мегаполистің барлық аудандарында мониторинг жұмыстары жүргізілетін болады.
