Төре билер төбе көрсетті. Іс-сапармен келген депутаттар межелі мерзім ішінде өңірдегі халықтың хал-ахуалымен таныспақ. Депутаттар бір күнде бір емес бірнеше басқосудың басы-қасында болды. Алқалы жиында айтылған түйткілді мәселелер жайында толығырақ тілші тарқатады.
Алдымен депутаттар 1 қалалық аурухананың күрделі жөндеу жұмыстарымен танысты. Заман талабына сай салынып жатқан ғимаратта педиатрия, неврология, урология, мамология, хирургия және өзге де бағыттар бойынша медициналық қызмет көрсетіледі. Сонымен қатар, бұл мекеме науқастарды жарақаттардан, нейрохирургиялық оталардан және инсульттан кейін оңалтумен де айналысады. Оған қажетті барлық құрал-жабдықтар және заманауи физиотерапия залы мен массаж бөлімі жұмыс істейді. Емдеу мекемесінде бір ауысымда 400 адамды қабылдайды Барлық қызметтерді МӘМС және кепілдендірілген медициналық қызметтің аясында пайдалануға болады. Сенаторлар орталықтың жұмысымен толықтай танысып, ем алушылармен әңгімелесті. Орталықтың басшылығына медициналық қызметтің сапасын барынша қадағалаудың маңыздылығын ескертті. Сондай-ақ аурухана басшысылығы да мекемебегі бірқатар проблемаларды алға тартып, оны шешу жолдарын да ұсынды.
Сондай-ақ кездесуде мегаполистегі өзекті түйткілдер, нақты айтқанда, инфрақұрылым және логистика мәселелерін шешу барысы талқыланды. Аталған проблемалардың оң шешімін табу үшін республикалық бюджеттен қаражат бөлу мәселесі де сөз болды.
Ары қарай депутаттар Шымкент қаласының мәдениет қызметкерлерімен кездесті. Айта кетейік, Шымкентте мәдениет, тілдерді дамыту және архивтер басқармасына қарасты 21 мекеме бар. Олар кітапхана, мәдениет үйі, театр, цирк, музей, архив, зоологиялық саябақ. Мекемелерде 2000-ға жуық қызметкер қызмет етеді. 2025 жылға дейін Шымкентте 259 мәдениет обьектісін салу жоспарланған.
Президент өз Жолдауында – мәдениет саласында қызмет атқарған азаматтарға жеткілікті түрде көңіл бөлінбей келгендігін өте орынды қозғады. Бұл салаға қолдаудың қай түрі де артық емес. Сондықтан Мәдениет саласының қызметкерлері өңірде әртістердің жалақысын көтеру, кітапханашы мамандығына бөлінетін грант санын көбейту сынды мәселелерді республикалық деңгейде көтеру керектігін айтты.
