Үшінші мегаполис төрінде алғаш рет 5 дүниежүзілік «Толағай» алыптар сайысының іріктеу кезеңі өтті. Ұлы Даланың батырларын насихаттау қазақтың этно-ойындарын дәріптеу мақсатында, өткізілген турнирге еліміздің жауырыны қақпақтай, иықтары тоқпақтай 15 спортшы қатысты. Нар тұлғалы жігіттер спорттың 5 түрінен бақ сынап, өз өнерлерін ортаға салды.
”Толағай” алыптар сайысы Шымкент қаласы әкімдігінің және қалалық дене шынықтыру және спорт басқармасының қолдауымен ұйымдастырылды. Үміткерлердің арасында әуесқойлар ғана емес, әлемдік ареналарда ел намысын қорғап жүрген кәсіпқой спортшылар да бар. Басты мақсат — салауатты өмір салтын насихаттап ғана қоймай, қазақ батырларын танымал ету.
Ел мерейін үстем етіп жүрген батырлар 5 кезең бойынша бәсекеге түсті. Жарысқа қатысушылар 1 минут ішінде қашықтыққа салмағы 100 келі табиғи тасты көтеріп жүру, 100 келі қапты көтеру, салмағы 200 келі арбаны сүйреу, найзаны қашықтыққа лақтыру бойынша сынға түсті. Сайыс қорытындысы бойынша 1-орынды Бағдат Маматқұл иеленсе, 2орынды Бағлан Мырзатаев қанжығасына байлады. Нимаджан Халметов пен Сәулет Абдусаликов үздік үштікті түйіндеді. Жеңімпаздар мен жүлдегерлер арнайы медальдармен және ақшалай сертификаттармен марапатталды.
