Бауырлас қалалар Шымкент пен Худжандтың арасындағы байланыс – экономикалық көрсеткішті жақсартып келеді. Жақында, 17-19 маусым күндері Тәжікстан Республикасының Худжанд қаласында «Сугд-2024» Х Халықаралық сауда жәрмеңкесі өтті. Оған Шымкент қаласы әкімінің бірінші орынбасары Қ.Асылов бастаған делегация қатысып қайтты. Іс-шара аясында Қазақстанның Тәжікістандағы елшісі У.Әмірханұлы қала әкімінің бірінші орынбасары Қ.Жұмабекұлы, Соғды облысының төрағасы Раджаббой Ахмадзодамен және Худжанд қаласының төрағасы Ш.Фирдавспен келіссөз жүргізді. Келіссөз барысында Шымкент пен Худжанд қалалары арасындағы ынтымақтастықты арттыру, экономиканың түрлі салаларында бірлескен жобаларды жүзеге асыру мүмкіндіктері талқыланды.
Сонымен қатар «Сауда-инвестициялық мүмкіндіктер және ынтымақтастықтың әлеуеті» тақырыбымен өткен бизнес-форумына қатысқан делегация үшінші мегаполистің инвестициялық мүмкіндіктері мен перспективаларын Өзбекстан Республикасының Ташкент, Наманған, Ферғана, Самарқан, Бұқара, Сырдария облыстарының әкімдеріне, Әзірбайжан Респуликасының Гянджа қаласының мэріне, Ресей Федерациясының Нижегород, Мәскеу, Свердловск, Пенза, Липец, Челябинск, Воронеж облыстарының губернаторларына және Қытай Халық Республикасының Шэньси провинциясының басшысы мен халықаралық қаржы ұйымдарына таныстырды.
Халықаралық сауда-жәрмеңкесіне шаһардан барған делегацияның қатарында кілем бұйымдарын шығаратын «Бал Текстиль» тоқыма кәсіпорны, аяқ киім шығарумен айналысатын «Lux Shoes» фабрикасы, «GraMaD retail», «Маркет» сауда желілері және «Колесников» көкөніс өндірісі өнімдері ұсынылды. Аталған кәсіпорындар еліміздегі нарықта өз орнын алған, тауарлары сұранысқа ие, отандық өнімдер.
Жәрмеңке қорытындысы бойынша бизнес-делегация өзге елдерден келген әріптестерімен 5 коммерциялық құжатқа және жалпы сомасы 400 мың АҚШ долларын құрайтын келісімшартқа қол қойды. Халықтың табысын арттыру үшін салынған өндіріс орындары қала экономикасын жақсартып, халықаралық туризмді дамытуда. Осы сапар аясында жасалған келіссөздер негізінде екі елдің арасындағы тауар айналымы ұлғайып, ол өз кезегінде сұраныстың артуына, жұмыс орындарының көбеюіне алып келеді. Мәселен, Шымкент қаласында жеңіл өнеркәсіп саласында 180-ге жуық кәсіпорын жұмыс істесе, оның 45 пайызы тоқыма фабрикаларының үлесінде. Соңғы 4 жылдықта бұл саланың инвестиция көлемі артқан. Қазіргі таңда «Бал текстиль» тоқыма фабрикасының өнімі алыс-жақын шетелге танымал. Қазақстандағы бірегей кілем өндіруші «Бал Текстиль» фабрикасының өнімдері экспортқа BAL CARPET брендімен шығып жатыр. Өткен жылы кәсіпорын тарапынан Тәжікстан, Ресей, Қырғызстан, Өзбекстан елдеріне 5 млрд теңгеден астаны қаржыға өнім экспортталған. Сауда туризмін дамытуға жол ашатын кездесуде жаңа бастамалар талқыланып, сала өкілдерінің тәжірибе алмасуына, іскерлік байланыстарды орнатуына мүмкіндік берді. Бауырлас қала Худжандтағы кездесу, жауапты сала басшыларының келісімі Шымкенттегі өндіріс орындарының өсімі мен көлемін ұлғайтуға сеп болмақ. Яғни, бұл іс-шаралар мегаполистің ынтымақтастықты арттырып, шет мемлекеттермен экономикалық байланыстарды дамытуға ұмтылысын көрсетеді. Іс-шара халықаралық байланыстарды нығайтуда Шымкент пен Худжанд арасындағы ынтымақтастықты одан әрі дамытуда маңызды қадам болып отыр.